Додека повеќето европски метрополи се шират во висина, Хелсинки одлучил да оди во спротивна насока - длабоко под земјата.

Под улиците на финската престолнина се наоѓа фасцинантен, паралелен свет кој не е само подготовка за „црни денови“, туку и живо, функционално јадро на секојдневниот живот.

Финската престолнина ја користи својата специфична подлога од цврст гранит за копање простори што служат за сè освен за она на што прво се помислува кога ќе се слушне зборот „бункер“.

На длабочина од околу 30 метри се наоѓаат детски игралишта со лизгалки, олимписки базени, па дури и картинг-патеки. Овие простори се високи, осветлени со модерен дизајн и исполнети со свеж воздух, па посетителите често забораваат дека над нив има тони карпа и жив градски сообраќај.

Безбедноста како дел од општествениот договор

За разлика од импровизираните засолништа што се паметат од историјата на Балканот, Хелсинки има повеќе од 5.500 наменски објекти кои можат да примат речиси еден милион луѓе. Тоа е повеќе од вкупниот број на жители на градот.

- Подготвеноста е во нашата ДНК - истакнуваат финските експерти објаснувајќи дека овие простори се користат секојдневно за да останат одржувани, но и за граѓаните да бидат навикнати и запознаени со нив во случај на вистинска опасност.

Подземниот град не е наменет само за спорт и за деца. Финската хеви-метал и панк-сцена дел од својот светски успех им го должи токму на овие подземни бункери, кои со децении служат како звучно изолирани простории за проби на бендови.

Во карпата се врежани и цркви, музеи, па дури и вештачки езера, со што јавната инфраструктура станала отпорна на суровите нордиски зими.

Овој модел покажува дека подготовката за вонредни ситуации не мора да биде мрачна. Во Финска таа е претворена во простор за иновации, игра и заедништво, создавајќи град кој е еднакво функционален и на површината и длабоко под неа.

Фото: Screenshot/YouTube