Анализа на калифорнискиот институт „Берклеј ерт“ покажува дека изминатото лето се измерени над 400 рекордни високи температури на воздухот во 29 земји помеѓу 1 мај и 30 август годинава.
Една третина од рекордните температури беа измерени во Германија, потоа во Франција и Холандија.
Во текот на летото во повеќе од 1.200 места во северната хемисфера беа измерени рекордно високи температури. Истражувањето опфатило и податоци од метеоролошки станици во северната хемисфера во текот на изминатите 40 години. Франција постави рекорд со температура од 46 Целзиусови степени, додека во Велика Британија, Белгија, Германија, Луксембург и во Холандија исто така првпат се забележани такви високи температури.
На некои места во Европа температурите се највисоки во последните 150 години, изјави д-р Роберт Род за Би-би-си. Во јули годинава беа соборени сите температурни рекорди низ целиот свет.
Температурите се искачија за 0,04 Целзиусови степени на глобално ниво, во споредба со најтоплиот месец во јули 2016 година. Научниците истакнуваат дека тоа е знак дека Земјата се загрева. Според научниците, јулскиот топлотен бран што ја зафати Европа е предизвикан од дејствата на човекот.
Извор: МИА