Новогодишните и божиќните празници со грип го поминале 207 граѓани во земјава. Грипот полека почнува да зема замав, а пресметките, според бројот на пријавени случаи на болни со симптоми на овој вирус во Институт за јавно здравје (ИЈЗ), покажуваат зголемување за 31% на бројот на заболени во првата недела од годинава во споредба со претходната. Како понатаму ќе тече ширењето на овој вирус, епидемиолозите велат дека тоа е лотарија.

- Проветрување кога не е загадено, кивање и кашлање во шамиче, избегнување контакт со болни, редовно миење на рацете се генерални препораки за да се заштитите. Во зима луѓето повеќе се во затворени простории зашто е студено и тоа се моментите кога вирусот се шири - вели д-р Александар Стојанов од скопскиот Центар за јавно здравје.
Бројот на пријавени лица оваа недела споредено со првата недела од минатата сезона е зголемен за 5,6%.

Најголем број случаи со симптоми на грип се пријавени од подрачјето на Струмица и на Гостивар.

Епидемиолозите од ИЈЗ велат дека вакцинацијата против сезонски грип е најефикасна заштита од ова заболување. Оттаму советуваат вакцинација, особено на лица што им припаѓаат на т.н. ризични групи (согласно препораките на СЗО): постарите лица (над 65 години); деца на возраст од 6 до 59 месеци; лица постари од 6 месеци со хронични болести; бремени жени и здравствени работници.

Инаку, во поголемиот дел од земјите во регионот доминантен е грипот од типот А, кој се смета за поопасен.

Заболувањето има ненадеен почеток со висока температура, главоболка, општа премаленост, истоштеност, болки во мускулите и во зглобовите, црвено и болно грло, гребење во грлото, солзење во очите и секреција на носот, како и кашлица која најчесто е сува, непродуктивна. Секој заболен не мора да ги има сите овие симптоми, а кај дел од заразените лица болеста може да помине и без симптоми (според податоци од некои студии, тој процент се движи од 20 до 30 отсто) или, пак, со благи симптоми на настинка.