Српското министерство за образование денеска донесе одлука распустот во основните и во средните училишта да се продолжи до 24 февруари на целата територија на Србија.

Како што јави дописникот на МИА од Белград, министерството соопшти дека одлуката е донесена со цел да се спречи ширењето на грипот, а врз основа на тековните епидемиолошки податоци од надлежните органи.

Министерот за образование Младен Шарчевиќ изјави дека одлуката е донесена во консултација со Институтот за јавно здравје „Батут“.

Претходно министерството за здравство препорача зимскиот распуст да се продолжи заради намалување на ширењето на вирусот на грип.