Прегледот на повеќе од 350 научни истражувања покажа дека сè поголемата понуда на намирници богати со протеини во продавниците може да им наштети на многу луѓе кои водат седечки начин на живот и немаат потреба од дополнителен внес на протеини.

Анализата, објавена во изданието на „Сел прес блу“, покажува дека намалувањето, наместо зголемувањето на внесот на протеини, би можело да го забави стареењето и потенцијално да го продолжи животниот век.

- Бидејќи повеќето луѓе водат релативно седечки начин на живот, веројатно е дека многумина внесуваат повеќе протеини отколку што навистина им се потребни, што веројатно има негативни последици по здравјето - вели Дадли Леминг, главен автор на анализата од Универзитетот во Висконсин-Медисон.

Авторите укажуваат на хормонот познат како фактор на раст на фибробластите 21, чие ниво се зголемува кога се намалува внесот на протеини. Овој хормон може да ја зголеми енергијата, да ја подобри контролата на шеќерот во крвта и да ги намали воспалителните процеси.

Аминокиселините застапени во исхраната богата со протеини, како метионинот, изолеуцинот и валинот, се чини дека ги активираат механизмите за раст кои го зголемуваат ризикот од дебелина, воспаленија и други заболувања поврзани со стареењето, се наведува во анализата.

Клиничките испитувања кај луѓе покажале дека лицата кои внесувале помалку протеини губеле телесна тежина и ја намалувале количината на масно ткиво, а истовремено им се подобрувало нивото на шеќер во крвта, дури и кога вкупно внесувале повеќе калории.

Кога станува збор за физички поактивните лица, Леминг наведува дека спортистите, се чини, се заштитени од негативните последици од високиот внес на протеини. Физичката активност ги насочува дополнителните аминокиселини кон мускулите, наместо кон биолошките процеси поврзани со развојот на заболувања.

Тој додава дека препораките за внес на протеини не треба да се засноваат само на возраста, туку и на тоа колку е физички активно лицето.

Извор: Forbes.vijesti.me
Фото: Magnific