Често на патиштата можеме да забележиме дека некои автомобили имаат знак „бебе во автомобилот“ на задната страна. Многумина претпоставуваат дека целта е да им сигнализира на другите дека во автомобилот има дете и поради тоа возачот вози побавно и повнимателно, а истото треба да го направат и другите учесници во сообраќајот.
Корисникот „Пентаграм моторспот“, експерт за моторни спортови од Англија, на својот профил на „Тик-ток“ објави видео во кое ги прашува своите следбеници дали погрешно го користат знакот за бебиња во автомобилот.
- Дали го користите знакот за да ги предупредите другите дека имате бебе во автомобилот и поради тоа возите побавно? - го поставува тој прашањето и открива дека целта на знакот не е тоа.
Всушност, не станува збор за симпатичен додаток, туку знак до службите за итни случаи.
- Ако сте доживеале сообраќајна несреќа и ако службите за итни случаи го најдат вашиот автомобил превртен во некоја долина или ве најдат вас онесвестени во автомобилот, овој знак служи за да им каже на службите за итни случаи да останат на местото на несреќата и да бараат бебе кое би можело да биде во возилото. Тоа е целта на знакот - открива тој.
Но, оваа ознака може да биде проблем бидејќи службите за итни случаи би можеле да претпостават дека имате дете во возилото дури и кога детето не е со вас.
Поранешната болничарка Ники Јуркуц, коосновач на програмата за прва помош „Тајни хартс еџукејшн“, на нејзиниот инстаграм-профил објаснува дека овој знак не е единствената работа на која болничарите обрнуваат внимание при сообраќајни несреќи, туку бараат индиции што укажуваат дека во возилото имало дете, како детско седиште и чанта.
Се верува дека овој знак го направил Мајкл Лернер, поранешен инвеститор во недвижности од САД, во 1984 година. Откако првпат го возел својот 18-месечен внук, сфатил дека луѓето стануваат нетрпеливи кога тој вози и сакал да најде начин да го заштити. Користејќи ги своите контакти во малопродажната индустрија, тој успеа да продаде 10 илјади знаци во првиот месец.
Извор:
n1info.hr
Фото: Freepik