Илон Маск верува дека штедењето за пензионирање во следните 10 до 20 години би можело да стане неважно доколку се остварат неговите предвидувања за развојот на технологијата. Во поткастот „Муншотс со Питер Дијамандис“ тој истакнал дека брзиот напредок во вештачката интелигенција, роботиката и енергетските системи би можел да доведе до свет на изобилство, каде што секој ќе има пристап до сè што ќе му биде потребно, без финансиски ограничувања.

Според визијата на Маск, екстремниот раст на продуктивноста би го овозможил она што тој го нарекува „универзален висок приход“, каде што луѓето би имале пристап до супериорна здравствена заштита, образование и производи, без денешните бариери. Таквото општество, како што наведува тој, би значело крај на сиромаштијата и слободен пристап до знаење и услуги за сите.

Визија за иднина без недостиг на добра и нејзината контроверзност

Сепак, Маск предупредува дека патот до таква иднина нема да биде без проблеми. Периодот на транзиција би можел да биде обележан со големи социјални превирања, нестабилност и губење на чувството за цел, бидејќи многу работни места би ја изгубиле важноста. Исто така, се поставува прашањето за значењето на работата во свет каде што основните потреби се целосно задоволени.

Оваа оптимистичка визија е во остра спротивност со сегашната реалност. Многу луѓе веќе се борат со растечките трошоци за живот, проблеми со образованието, здравствената заштита и домувањето. Истражувањата покажуваат дека мнозинството граѓани не штедат доволно за пензионирање, а економската неизвесност дополнително го зголемува стравот од иднината.

Затоа изјавите на Маск предизвикуваат мешани реакции. Додека некои ја гледаат неговата прогноза како увид во технолошката иднина, други ја гледаат како опасен совет бидејќи напуштањето на штедењето би можело да има сериозни последици ако таквото сценарио не се оствари. Во овој контекст, пораката на Маск повеќе личи на филозофска рефлексија за можниот развој на светот отколку на практичен финансиски совет за денешните услови.

Извор: benchmark.rs

Фото: Freepik