Европската комисија ја отвори темата за летното сметање на времето, односно за укинување на поместувањето на часовникот во сите земји на Европската Унија, кое ќе трае до утре. За тоа можат да се изјаснат сите европски граѓани преку онлајн-прашалникот на официјалната страница на ЕК.

Имено, застапниците во Европскиот парламент уште во 2017 година објавија истражување за позитивните и негативните влијанија на летното сметање на времето и во февруари упатија повик до Комисијата за темелна анализа на Директивата која го пропишува поместувањето на часовникот. Комисијата се обврза да ги процени двете главни опции - задржување на сегашното летно сметање на времето или укинување на поместувањето на часовникот двапати годишно во сите земји-членки.

Ваквата одлука не би влијаела врз избирањето на временските зони, а секоја членка и понатаму сама би одлучувала дали трајно ќе го задржи летното или зимското сметање на времето или, пак, би се определила за трета опција.

Со Директивата 2000/84/ЕZ од 19 јануари 2001 година е утврдено ЕК на секои пет години да објавува соопштение во кое дава распоред на датуми кога ќе почнува и завршува летното сметање на времето во следните пет години. Со ваквиот законски пропис Комисијата сака да ги обврзе сите земји-членки на еднакво сметање на времето за да осигури функционирање на единствениот пазар. Тоа најмногу се однесува на фреквентната логистика и комуникација, со оглед на тоа дека неусогласеното сметање на времето меѓу земјите би го отежнало планирањето на летовите и возните редови на возовите и на автобусите за туристите и организаторите на патувањата.

Самата идеја за летно сметање на времето му се припишува на американскиот физичар Бенџамин Френклин, кој уште во 1784 година заклучил дека подоброто усогласување на човечките активности со дневната светлина би можело да донесе заштеда на енергија. Летното сметање на времето било воведено во цела Југославија во 1983 година.


Да разјасниме, различните преференции за сметањето на времето се појавуваат поради различните географски позиции на земјите. Во северните земји денот во текот на летните месеци е подолг, а летното сметање на времето го одложува заоѓањето на сонцето. На пример, во Хелсинки се стемнува во околу 23 часот, но сонцето излегува уште во околу 3:30, а слично е и во другите северозападни градови. Поради таа причина, дури 70.000 Финци потпишаа петиција за укинување на летното сметање на времето.

Така, ако се одлучи секоја земја да одбере дали сака да има зимско или летно сметање на времето, тие промени би биле некоординирани, со што би се поништила главната цел на Директивата.