Горливата тема на аерозагадувањето и на климатските промени вчера предизвика дискусија помеѓу младите учесници на „Џифони Македонија“, во која ги водеа претставнички на здружението „Еко свест“. Добро информирани, но признаа дека им недостига повеќе знаење на темата да стекнат на училиште. Елена Николовска и Ана Чоловиќ-Нешоска од „Еко свест“ им порачаа на младите:
„Еко свест“ ги заинтересира младите за темата на климатските промени
- Политичарите многу сакаат да зборуваат и никогаш не се движат со темпото што ние го сакаме. Вклучете се во движења, групи, здруженија и бидете гласни и ќе ги поттикнете политичарите, и да не седите со скрстени раце!
На начин приспособен за нивната возраст, а и со квиз, од „Еко свест“ ги информираа младите што е најважно да знаат за оваа тема.
- 97 проценти од климатските научници веруваат дека климатските промени се предизвикани од човечки фактор и луѓето многу често не веруваат во тоа. Но, не е ни важно дали верувате или не. Најважното е дека постојат климатски промени и дека мора нешто да направиме за да ги спречиме и да ги ублажиме - рече Николовска.
Ана Чоловиќ-Нешоска и Елена Николовска
Гимназијалка од Скопје сподели дека заедно со малкумина во своето училиште се обидуваат да влијаат врз екосвеста.
- Во нашето училиште формиравме клуб насочен кон овие прашања, но главен проблем ни е што не знаеме како да ги придобиеме младите да ни се придружат и многу е мал бројот на нашите соработници што сакаат да придонесат. Треба повеќе да учиме на училиште за ова. Најмногу што нè учат е за озонската дупка, а не и за климатските промени - вели таа.
Бендот „Дупер“ вчера беше вистинска ѕвезда на третиот ден на „Џифони Македонија“. Младите им ги пееја песните, имаа еден куп прашања да им постават, а и се сликаа со нив. Борис Какуринов, гитара и клавијатура, и Илчо Нечовски, вокал и бас-гитара, искрено одговараа на сите прашања, доловувајќи ја својата приказна. Признаа дека не им треба нов член во бендот, иако дека добар женски вокал е добредојден за соработка.
Бендот „Дупер“ предизвика огромно внимание кај младите
- Завршивме во гимназијата „Орце“, каде што на часовите по музичко многу често свиревме двајцата. Со тек на време, си рековме дека треба да направиме наша музика и да не бидеме како оние што само зборуваат дека немаме музичка сцена. Решивме да го извадиме најдоброто од нас. Ние имаме другарство и однос меѓу себе што е редок и треба да се чува - вели Борис.
На прашањето дали повторно би работеле со продукциска куќа, откако не соработуваат со „Авалон“, двајцата споделија дека денес може сè да постигнат сами.
Илчо сподели дека се среќни што многу луѓе им ја слушаат музиката, на некои дури и им се допаѓаат, а некои и ги пеат.
- Уживаме во сопствената музика и како луѓето реагираат. Нема да пееме на англиски јазик. Ние двајцата сме Македонци и чудно ми е да пееме на англиски. Не сум чул Американци да пеат на друг јазик. В година излегува нов албум и ќе се вика „Хипер“ - вели Нечовски.
На прашањето дали знаеле однапред дека „Не сум твој тип“ ќе биде хит, одговорија:
- Не можете да замислите и однапред да знаете кои песни ќе ви бидат хит. Имавме две песни што мислевме дека ќе бидат хит, а не ги ни снимивме. Цело време експериментираме со жанровите. Сакаме да правиме рап, ќе правиме и метал, а веќе имаме и една транс-песна.
На прашањето дали би учествувале на „Евровизија“, рекоа категорично: „Нема шанси!“
Споделија за нивниот прв настап, кој бил токму пред МКЦ.
- Беше многу ладно, бевме слабо облечени, ама ни беше многу жешко, имаше многу луѓе и бевме многу нервозни. Но, испадна супер - вели Илчо.
Актерот Стефан Спасов (средина) и режисерот Сергеј Ѓеоргиев заедно со модераторот Марти Али
Тој сподели со публиката дека музика што многу го смирува е класичната, особено чешките композитори.
- Како мал одев на музичко и слушав класика и ми остана таа музика, особено чешките композитори. Омилена композиција ми е „В’лтава“ од Беджих Сметана.
На прашањето дали имаат идоли, тој одговори дека тоа се неговите родители.
Младите кадети и сениори вчера ги запознаа и авторите на филмот „Јас не сум Игор“. Тие покажаа голем интерес и одлично го примија филмот што го промовираа режисерот Сергеј Ѓеоргиев и актерот Стефан Спасов.
На меѓународната вечер џифонци од 10 земји се претставија во најдобро светло, со специјалитети од нивните земји, а забавата за младите продолжи со диџеј Џани Мирабело од Италија.
Патувачката училница Una vita da social – Живот на социјалните мрежи деновиве предизвикува големо внимание кај младите и наставниците од повеќе општини во Скопје. Денес училницата ќе се најде пред А1 Арената „Борис Трајковски“, а експерти од италијанската полиција на младите ќе им доловат како е најдобро да се заштитат од измами на социјалните мрежи.
На меѓународната вечер секоја земја се претставува како знае