Фотографите сигурно ќе посакаат да имаат шанса да престојуваат на Меѓународната вселенска станица бидејќи орбиталната станица нуди постојано променливи погледи на Земјата од 400 километри нагоре.
Затоа, не е изненадување што модулот „Купола“ со седум прозорци на вселенската станица, со своите неверојатни панорамски погледи на Земјата и пошироко, е најпопуларното место меѓу астронаутите кои имаат доволно среќа да го посетат.
Додека некои едноставно гледаат надвор од „Куполата“ за да се восхитуваат на пејзажот, други ја земаат камерата за да го доловат најдоброто од она што го гледаат пред да го споделат со нас овде на Земјата.
Сегашниот жител на Меѓународната вселенска станица, Марк Ванде Хеи, кој пристигна на станицата во април 2021 година, повремено споделува фотографии направени од високо, а неговиот последен обид повеќе личи на нешто што можеби го насликал Ван Гог отколку на фотографија.
Неверојатната снимка е направена над Хималаите, при што Ванде Хеи од НАСА ги предизвикува луѓето да го забележат Монт Еверест, највисоката планина на светот.
- Мојата новогодишна одлука е да излегувам што е можно повеќе. Но, тоа откако ќе слетам. Дали можете да го забележите Монт Еверест на оваа фотографија? - напиша тој на неговиот твитер-профил.
Францускиот астронаут Томас Песке е еден од попознатите астронаути кои редовно споделуваат фотографии. Во објавата кон крајот на неговиот последен престој, кој заврши во ноември, Песке откри дека е потребно големо планирање за правење впечатливи слики од Меѓународната вселенска станица.
Тоа е затоа што астронаутите таму го поминуваат поголемиот дел од времето работејќи на научни експерименти наместо да гледаат низ прозорецот. Плус, со оглед на тоа што станицата орбитира околу Земјата 16 пати на ден, погледите на интересните места се само минливи. Тоа го поттикнало Песке да планира однапред со помош на специјалниот софтвер за навигација на НАСА кој го покажува времето на Меѓународната вселенска станица, предвидувања на облаците и, што е најважно, прецизна маршрута на приближување на орбитите.
Што се однесува до добрите напори на Ванде Хеи, дали успеавте да го забележите Еверест?