Платени дежурства и надомест за здравствено осигурување е нешто што првпат го добиваат специјализантите во нашата држава. Решавањето на ова прашање ги опфаќа сите идни приватни специјализанти и придонесува за зголемување на мотивацијата при работењето. На овој начин се стремиме кон дополнителна мотивација за оваа група лекари. Министерството за здравство активно ги слуша барањата на здравствените работници и прави напори да ги реализира во рамките на своите можности, пишува во соопштението на Министерството за здравство.

- Со здравственото осигурување, за кое процедурата е во тек, првпат приватните специјализанти се здравствено осигурани, што значи дека може бесплатно да се лекуваат во установите во кои работат. Со најавените платени дежурства, кои треба да почнат од 1 јуни, исто така првпат специјализантите добиваат платени дежурства, со што се подобрува статусот на специјализантите, нормално и мотивираноста за работа, поради тоа што дежурствата се 20/20 или 24-часовна работа. Во зависност од потребите на клиниката и во зависност од бројот на специјализантите што се на располагање на клиниката, зависи и бројот на дежурства. Во овој период на ковид-криза бројот на специјализанти што работеа на клиниките беше помал, што значи дека бројот на дежурства се зголемуваше. Во изминатите месеци се случувало да имаме и по шест дежурства месечно, тоа е 24-часовна работа - изјави Симона Сапунџија, специјализант на Клиниката за уво, нос и грло.

Откако претходно специјализантите ќе пополнат изјава во ФЗО на РСМ дека немаат други приходи освен надоместокот кој го добиваат од државата, ќе добијат надомест за здравствено осигурување.