Основачот и главен извршен директор на компанијата LVMH, Бернард Арно, го загуби второто место на листата со милијардери на Блумберг откако го претекна претседателот на „Амазон“, Џеф Безос. Прв на листата и понатаму е американскиот милијардер Илон Маск.

Во моментов Безос е на второ место со 156 милијарди долари, додека Бернард Арно е трет на листата со богатство од 155 милијарди долари, пренесува Блумберг.

Вредноста на имотот на Бернард Арно падна за 6,8 милијарди долари од средата кога LVMH соопшти дека нејзината продажба годинава се зголемувала побавно од очекуваното.

Падот на извршниот директор на LVMH на листата со милијардери ја одразува продажбата на луксузни стоки која е послаба во 2023 година поради падот на побарувачката во САД и тешкото економско закрепнување во Кина.

Спротивно на тоа, богатството на Џеф Безос порасна за 49,3 милијарди долари оваа година бидејќи вредноста на акциите на „Амазон“ се зголеми за 58 отсто во истиот период.