Од осум жртви на трговија со луѓе годинава, седум се малолетни. Генерално, трговијата со луѓе како кривично дело сѐ повеќе се прави преку интернет, а загрижува и фактот што возрасната граница се намалува и доколку жртвите пред десетина години биле од 16 години нагоре, сега се од 10 до 17 години. Криминалците сѐ повеќе ја таргетираат онаа група што најмногу го користи интернетот, а најмалку се информирани за опасностите.

Во рамките на одбележувањето на Европскиот ден за борба против трговија со луѓе – 18 октомври, МВР заедно со партнерите од ОН, Советот на Европа и Отворена порта ќе поделат брошури за подигнување на свеста на учениците за опасноста од злоупотреба на компјутерската технологија низ 33 училишта во земјава.

Државната секретарка на МВР и национална координаторка за борба против трговија со луѓе, Магдалена Несторовска, посочи дека генерално самата трговија со луѓе како кривично дело сѐ повеќе се прави преку злоупотреба на информатичката технологија.

- Користењето на онлајн комуникацијата за криминалците овозможува поголема анонимност и поголема профитабилносот и поради тоа сѐ повеќе се ориентираат на регрутирање и контрола на жртвите преку интернет-комуникација - изјави Несторовска.

Таа посочи дека од осум жртви на трговија со луѓе годинава, една е конкретно жртва преку онлајн комуникација.

Според извршната директорка на „Отворена порта“, Јасмина Димишковска-Рајковска, модерното време и употребата на интернет и технологија ги изложуваат децата на ризик, посочувајќи дека резултатите од нивните истражувања покажуваат дека децата ги користат социјалните платформи „Снепчат“, „Твитер“, „Инстаграм“ итн. и стапуваат во контакт со лица кои ги познаваат и не ги познаваат.

- Загрижува делот што открива дека најголем дел од нив стапиле во контакт со лице што не го познаваат, а подоцна дел од нив оствариле и физички контакт со такви лица - изјави Рајковска.