Кога започна ковид-пандемијата, целиот свет беше затворен. Тогаш Малезијците главно беа оставени сами на себе. Поради ова, многумина беа принудени да посегнат по заштедите за да преживеат. Потоа владата донесе радикална одлука.
Имено, им овозможи на луѓето од сите возрасти да земат пари од пензискиот фонд. Со ова беа извлечени милијарди малезиски рингити, а сега многу Малезијци се на работ на катастрофа, односно многу пензионери се изложени на ризик од сиромаштија.
Британската фондација за резолуција ги повикува британските власти да го направат она што го направија малезиските власти за време на пандемијата. Фондацијата тврди дека на овој начин Британците ќе успеат да ги надминат финансиските проблеми. Сепак, повлекувањето готовина или заем од пензиските фондови беше успешно во Америка и во Јужноафриканската Република, но предизвика криза во Малезија.
Флексибилен пензиски систем
Малезија го има еден од најдобрите пензиски системи на хартија. Работниците во пензискиот фонд исплаќаат 11 отсто од вкупната плата, а работодавците 12 отсто. Пензискиот систем во оваа земја е значително пофлексибилен отколку во многу побогати земји.
Малезискиот пензиски систем е систем на „две лончиња“. Еден лонец е фонд од кој не може да се подигнат пари до 55 години, а вториот лонец е фонд кој вреди речиси една третина од вкупниот износ на двата фонда, а може да се искористи за купување куќа, плаќање за образование и лекување.
Фото: Freepik
За време на пандемијата, на сите Малезијци им беше дозволено да земаат готовина од пензискиот фонд во четири наврати, што вкупно изнесуваше 145 милијарди рингити. ЕПФ како главен пензиски фонд во Малезија за вработените во приватниот сектор забележа дека неговите средства се намалија за 15 отсто, откако повеќе од осум милиони луѓе зедоа готовина за да го преживеат финансискиот шок предизвикан од пандемијата.
Како резултат на тоа, милиони луѓе не можеа да се пензионираат. Просечната сума достапна за пензионирање на едно лице беше намалена за 50 отсто од 2019 до 2022 година и изнесуваше само 8.100 рингити. Тоа значи дека половина од пензионерите би живееле под прагот на сиромаштија додека најбогатите 2 отсто би можеле да живеат пристојно од својата пензија.
„Рецепт за катастрофа“
Џефри Вилијамс, економист на Малезискиот институт за економски истражувања, истакнува дека неуспешниот експеримент на Малезија со суперфлексибилен пензиски систем треба да послужи како предупредување за другите земји.
- Примерот од Малезија покажува дека повлекувањето пари од пензиските фондови води до широко распространета пензиска несоодветност и сиромаштија кај постарите лица. Во најдобар случај, тоа бара целосно преиспитување, а во најлош случај, тоа е рецепт за катастрофа - рече Вилијамс.
Тој смета дека не е прифатливо да се дозволи секој да зема пари од пензискиот фонд и тешко дека Малезија ќе го повтори тоа.
Малезиската влада го реструктурира ЕПФ и воведе трет фонд, кој ја ограничи исплатата на пари на помали износи. Сепак, ќе бидат потребни големи реформи за да им се гарантира на пензионерите приход над прагот на сиромаштија.
Фондот со „две лончиња“ беше сериозно оштетен уште пред пандемијата, а дел од причината за тоа е повлекувањето пари за домување и други трошоци за живот.
Извор:
Telegraph.co.uk
Фото: Freepik