Астрономите ја открија најбрзата позната ѕвезда во Млечниот Пат. Наречена С301, таа со неверојатна брзина орбитира околу супермасивната црна дупка Стрелец А во центарот на нашата галаксија, а на научниците би можела да им овозможи најдиректно мерење на нејзината ротација, како и нов тест на Ајнштајновата теорија на релативноста.

Ѕвездата С301 се движи со брзина од околу 25.000 километри во секунда, односно околу 100.000 пати побрзо од патнички авион. Тоа значи дека при најголемата брзина достигнува околу 8 отсто од брзината на светлината.

С301 воедно е најблиската позната ѕвезда до супермасивната црна дупка Стрелец А, која се наоѓа во центарот на Млечниот Пат.

Црната дупка ја заобиколува за само 8,7 години

Особено интересна е нејзината исклучително тесна и издолжена орбита.

- Она што е посебно кај оваа ѕвезда е тоа што орбитира околу Стрелец А по многу тесна орбита, за која ѝ се потребни само 8,7 години, а до црната дупка се приближува на само 12 пати поголемо растојание од она меѓу Земјата и Сонцето. Тоа е без преседан - изјави Феликс Манг од Институтот „Макс Планк“.

Во најблиската точка, ѕвездата се приближува до црната дупка на растојание споредливо со размерите на Сончевиот Систем.

Би можела да помогне во тестирањето на Ајнштајн

Близината на С301 до црната дупка им дава на научниците ретка можност да ја проучуваат екстремната гравитација. Според општата теорија на релативноста на Ајнштајн, ротирачката црна дупка на некој начин го „влече“ простор-времето и така влијае врз орбитите на објектите што се наоѓаат доволно блиску до неа.

С301, со својата блиска, брза и многу издолжена орбита, претставува речиси идеален објект за мерење на овој ефект.

- Првпат би можеле многу директно да ја измериме ротацијата на масивна црна дупка, што би било клучен тест на теоријата на Ајнштајн - изјави Стефан Гилесен, еден од авторите на истражувањето објавено во списанието „Нејчр“.

Клучен би можел да биде нејзиниот премин во 2031 година

Научниците успеале да го реконструираат движењето на С301 до 2017 година, а особено важен ќе биде нејзиниот следен близок премин покрај црната дупка во 2031 година. Тие се надеваат дека во следните десетина години ќе соберат доволно податоци за да ја измерат ротацијата на Стрелец А.

Претходно се претпоставуваше дека за такво мерење ќе биде потребно да се следат повеќе ѕвезди со децении.

И покрај неверојатната близина, астрономите не очекуваат С301 да падне во црната дупка.

Откритието е направено со помош на интерферометарот „Вери ларџ телескоп“ на Европската јужна опсерваторија во Чиле, кој ја комбинира светлината од 4 телескопи со пречник од 8 метри.

Извор: Tportal.hr
Фото: Magnific