Германската полиција предложи да започне проверка на профилите на социјалните мрежи на оние што аплицираат за шенген-виза.

Германската полиција препорача да се покренат интензивни истраги на социјалните мрежи за оние што аплицираат за шенген-виза за да се процени ризикот од измама.

Како што се вели во германскиот документ, полицијата сака да користи истражување со отворен код за сите баратели на виза, а сака и да развие таканаречени ризични профили. Оваа препорака е дел од прирачникот за измама со шенген-визи, а главната цел е да се процени ризикот на апликантите да извршат визна измама, велат германските власти.

Прирачникот препорачува властите да собираат информации за барателите на виза од јавно достапни извори, но и од веб-страници и социјалните медиуми.

Исто така, се препорачува да се креираат профили што ќе го проценат нивото на ризик поврзан со барателите. Овие профили би ги сумирале нивните информации врз основа на критериуми како пол, возраст, потекло, групи на лица, начин на патување, маршрута, орган што ја издава визата, цел на патувањето, дестинација и други информации.

Имајќи го предвид големиот број странски државјани што аплицираат за шенген-визи секоја година и зголемениот број случаи на измами, полицијата истакна дека оваа мерка значително ќе помогне да се потврдат информациите за барателите на виза.

Портпаролот на германската полиција вели дека истражувањето на социјалните мрежи ќе се користи за да се потврдат информациите што се веќе достапни за сите други. Покрај тоа, забележано е дека таквиот пристап ќе им помогне на властите да направат конкретни прашања за одредени апликанти и да не ги оценуваат според субјективни критериуми.

Портпаролот рече дека собирањето такви информации за барателите на визи спаѓа во правната рамка за гранични контроли и е во согласност со правилата за издавање шенген-визи.