Кралското астрономско друштво во Дарам, Велика Британија, објавило дека мистериозен меѓуѕвезден објект кој бил откриен минатата недела е веројатно најстарата комета некогаш видена, веројатно постара од нашиот Сончев Систем за повеќе од три милијарди години.

Посетителот „богат со воден мраз“, наречен „3И/АТЛАС“, е само третиот познат објект надвор од нашиот Сончев Систем некогаш забележан во нашето космичко соседство и првиот што пристигнал од сосема различен регион на нашата галаксија Млечен Пат.

Според астрономот Метју Хопкинс од Универзитетот „Оксфорд“, тој би можел да биде стар повеќе од седум милијарди години и би можел да биде најзначајниот меѓуѕвезден посетител досега.

За разлика од претходните два објекта што влегоа во нашиот Сончев Систем од други делови на универзумот, овој се чини дека патува по стрмна траекторија низ галаксијата, што сугерира дека потекнува од „дебелиот диск“ на Млечниот Пат, популација од древни ѕвезди што орбитираат над и под тенката рамнина во која се наоѓаат Сонцето и повеќето ѕвезди.

- Сите комети што не се меѓуѕвездени, како што е Халеевата комета, се формирале со нашиот Сончев Систем, па затоа се стари до 4,5 милијарди години. Но, меѓуѕвездените посетители потенцијално можат да бидат многу постари, а од оние што се познати досега, нашиот статистички метод сугерира дека „3И/АТЛАС“ е многу веројатно најстарата комета што некогаш сме ја виделе - истакнал Хопкинс.

Објектот првпат бил забележан на 1 јули 2025 година, од телескопот АТЛАС во Чиле, кога бил на околу 670 милиони километри од Сонцето, а истражувањето на Хопкинс предвидува дека објектот треба да биде богат со воден мраз.

- Ова е објект од дел од галаксијата што никогаш не сме го виделе одблизу. Сметаме дека постојат две третини шанса оти оваа комета е постара од Сончевиот Систем и оттогаш талка низ меѓуѕвездениот простор - истакнал професорот Крис Линтот, коавтор на студијата и презентер на емисијата „Небото ноќе“ на Би-би-си.

Како што се приближува кон Сонцето, светлината ќе ја загрее површината на кометата „3И/АТЛАС“ и ќе ја поттикне кометната активност - ослободувањето пареа и прашина што создава сјајна опашка.

Првите набљудувања веќе сугерираат дека кометата е активна и евентуално поголема од нејзините меѓуѕвездени претходници. Доколку се потврди, тоа би можело да има импликации за тоа колку слични објекти ќе откријат идните телескопи, како што е новата опсерваторија „Вера Ц. Рубин“. 

Наодите на тимот доаѓаат од примена на модел развиен за време на докторското истражување на Хопкинс, кој ги симулира својствата на меѓуѕвездените објекти врз основа на нивните орбити и веројатното ѕвездено потекло.

Моделот на истражувачите, наречен „Отаутахи-Оксфордски модел“, ја означува првата примена на предвидливо моделирање во реално време на меѓуѕвездена комета.

Истражувачите велат дека „3И/АТЛАС“ треба да биде видлив преку аматерски телескоп со разумна големина кон крајот на 2025 година и почетокот на 2026 година.

Извор: vidi.hr

Фото: Freepik