По објавувањето на сторијата на Факултети.мк за огромната желба на Викторија да оди на факултет, се јавија од ФОН Универзитет дека со целосна стипендија ќе го покријат нејзиното студирање и ќе ѝ овозможат да учи од дома.
„Не ми се верува, јас студент, ќе имам индекс в рака и ќе може да учам дизајн. Им благодарам на сите, ветувам дека ќе бидам најдобрата студентка“. Со овие зборови и со солзи радосници 18-годишната Викторија Пенова, која боледува од ретка болест што ја имаат само 800 луѓе во светот, ни се израдува откако ѝ ја кажавме веста дека ќе студира. По објавувањето на
сторијата на Факултети.мк за огромната желба на Викторија да оди на факултет, се јавија од ФОН Универзитет дека со целосна стипендија ќе го покријат нејзиното студирање и ќе ѝ овозможат да учи од дома.
За неа и држењето на книгата в раце е голем напор бидејќи боледува од ретка болест - фибродисплазија осификанс прогресива (ФОП). На луѓето што го имаат ова заболување мускулите им се претвораат во коски и тие не можат да се движат нормално. Токму затоа Викторија бараше помош од образовна институција која ќе ѝ ги покрие сите трошоци за студирање и најважно - ќе ѝ овозможи да учи од дома бидејќи таа е целосно зависна од инвалидска количка. Сето ова Викторија ќе го добие од ФОН Универзитетот.
- Кој би рекол дека ќе стигнам до тука? Почнувам нова страница, почнувам да студирам на факултет. Да ме прашавте пред една година дали би помислила дека вакво нешто ќе се случи, би рекла дека тоа е невозможно. Имав голема желба да одам на факултет, но со оглед на мојата состојба си велев дека многу тешко може да се случи тоа и не се надевав премногу. Едноставно не сакав на крај да бидам разочарана. Ете, сега можам да кажам дека сум пресреќна. Пресреќна бидејќи мојот сон се оствари. Ќе студирам на ФОН Универзитет, дизајн и мултимедија. Тоа е нешто што сакам да го работам. Се чувствував горда на самата себе кога ја примив веста дека од ФОН сакаат да ми помогнат да студирам. Се надевам дека сѐ ќе биде во ред и ќе успеам да го завршам факултетот. Со многу упорност и труд, верувам дека ќе успеам. Очекувам да учам, да научам и да успеам – вели Викторија.
Вистинско славење во домот на скромното семејство Пенови ќе има денеска, кога Викторија и официјално ќе ги поднесе документите до Факултетот за дизајн и мултимедија на ФОН. Кога нејзиниот татко нѐ праша дали може со себе да ја земе и Викторија, односно дали ќе може со количката да се движи низ просториите на ФОН, му кажавме дека е обезбеден пристап за лица со посебни потреби низ целиот комплекс. Ова всушност е најголемата болка и страв за семејството Пенови. Каде и да појдат, имаат проблем да стигнат и да се движат со оглед на условите за лицата со хендикеп во која било институција во земјава. Но, Викторија сега ќе може да се движи слободно на факултетот со помош на нејзината количка.
Генералниот менаџер на ФОН, Сефер Цаноски, воопшто не сакаше да се објави веста дека тие ќе ѝ помогнат на Викторија, но на наше инсистирање, а и на родителите на Викторија, кои сакаат јавно да се заблагодарат, решивме да ја објавиме. Цаноски ни објасни дека ФОН има општествена одговорност и дека има задача да им помага на лицата со развојни тешкотии.
- Ние веќе 15 години им овозможуваме на лицата со развојни тешкотии да учат, има услови за движење во просторот, програми кои им овозможуваат да учат од дома, обучени професори. Викторија ќе добие целосна стипендија од пет години, ќе го студира тоа што го сака, на Факултетот за дизајн и мултимедија. Кога сака ќе може да дојде на факултетот, има пристап низ целата зграда. Ќе се труди и ќе учи како секој студент тука, а ако понатаму има желба, ќе ѝ помогнеме и за вработување. Нема да правиме да се чувствува привилегирана, туку едноставно ќе биде прифатена како сите студенти тука, целта ни е да има секојдневие како секој млад човек. Ќе има можности да оди и на летни и на зимски школи, да учи од професори од Италија и ѝ посакувам многу среќа – вели Цаноски.
Викторија ќе студира на ФОН
Се претпоставува дека од оваа опасна болест боледуваат околу 800 луѓе во светот. Меѓу нив е и Викторија, на која ѝ е дијагностицирана на две и полгодишна возраст. Од пред седум години е прикована за инвалидска количка. Оттогаш трае нејзината борба со ФОП, за која ја напиша и книгата „Победничка“. Викторија во претходното интервју ни потенцираше дека постојано се соочува со предрасуди во општеството. Таа посака секаде да има пристапни рампи за да може да оди каде што ќе посака, па на тој начин да не се чувствува поинаква од другите.
- За лицата со физички хендикеп може да се направи многу, на пример, да ги охрабриме и да им помогнеме да се школуваат, а подоцна и да се вработат – ни рече Викторија. Се надеваме дека кај новото семејство, во новата средина, ќе се чувствува безбедно, пријатно и мотивирано, меѓу нејзините врсници, каде што и всушност припаѓа.
Курс од СЕДЦ (Сивус едукативниот и развоен центар)
Викторија ќе добие и бесплатен курс од Сивус едукативниот и развоен центар со што ќе ѝ се овозможи да совлада основни активности кои ќе и помогнат во студирањето.
- Со Викторија одржавме една информативно – консултативна скајп средба на која и пренесовме дека Сеавус едукативен и развоен центар за почеток сака да ѝ
понуди менторство за изучување на една Adobe Апликација (Photoshop) . Договорот е дека од нас ќе добива инструкции како и работни материјали и туторијали кои ќе ги комбинираме со менторски сессии онлајн со нашиот инструктор. Заеднички се согласивме дека ова ќе биде тест за тоа дали и колку ефикасни (и напорни) ќе бидат овие активности од што ќе зависи и дали понатаму ќе има простор да соработуваме на некој следен курс. Секако во предвид го имаме и фактот дека таа ќе биде редовен студент на ФОН. СЕДЦ е општествено одговорна компанија ориентирана кон поддршка на талентирани млади, но овојпат ни е посебно драго што можеме да помогнеме на лице со ретка болест – велат оттаму.