Македонскиот граѓанин најголем дел или третина од времето во денот го поминува во спиење. Статистичките податоци покажуваат дека 36 проценти од времето ги троши на спиење.

На слободни активности отпаѓаат 22 процента од времето, по 10 проценти на домашни активности и вработеност, 9 проценти на јадење и пиење, по 4 проценти на патување и школување и 1 процент на други активности.

Лицата постари од 10 години просечно по осум часа и 44 минути поминуваат во спиење преку ден или ноќ.

Два часа и 25 минути на домашни активности, како подготвување храна, миење садови, чистење на станот, перење, пеглање, рачни изработки, градинарство, грижа за домашни миленичиња. Тука спаѓаат и активности поврзани со домаќинството, како што се градење и поправка, купување и разни услуги, грижа за деца...

Два часа и 30 минути македонскиот граѓанин троши на главна и дополнителна работа, вклучувајќи ги и кратките паузи за време на работата, патувањето за време на работата, прекувремената работа и патувањето поврзано со вработеност, службен пат, семинар и друго.

Македонскиот граѓани јаде и пие просечно по два часа и 14 минути, 56 минути троши за лична хигиена, грижа за сопственото здравје, интимни односи, како и активности што се вршат бесплатно за член од семејството, роднина, пријател или слично.

Педесет и две минути од времето просечно се трошат за патување, кое вклучува пат од и до работа, патување поврзано со школување, патување поврзано со купување и услуги, со грижа за децата или друга грижа за домаќинството, патување поврзано со дружење, патување поврзано со реализација на хоби, спорт, одмор...

Податоците од анкетата на Државниот завод за статистика ја прикажуваат традиционалната поделба на работите меѓу мажите и жените. Мажите поголем дел од времето го поминуваат на платена работа, додека кај жените, домашните активности одземаат најголем дел од времето.

И кога се вработени, повторно жените предводат во домашните активности со голем процент. Вработените жени учествуваат со 14 проценти за разлика од вработените мажи, кои учествуваат со само 5 отсто во тие активности.

Од времето што жените го поминуваат во домашни активности дури 37 проценти се за подготвување храна, додека мажите за подготвување храна трошат 12 проценти од времето. Миењето садови кај жените зазема 16 проценти од домашните активности, додека кај мажите 2 проценти.

Најмалку слободно време имаат лицата на возраст од 25 до 44 години, а најголем дел од дневното просечно потрошено време е на работното место. Најмногу време за слободни активности имаат лицата на возраст над 65 години.

Граѓаните во Македонија најголем дел од слободното време го поминуваат пред телевизор - 40 проценти од слободното време, потоа на одморање, користење компјутер, дружење, шетање и пешачење.

Извор: МИА