Истражувачите ја искористиле ретката можност да проучуваат идентични близнаци кои биле разделени во детството и биле одгледани и воспитувани во различни земји од различни семејства.

Со оглед на тоа што се покажа дека коефициентот на интелигенција е до 80 отсто наследен - со близнаци кои обично добиваат приближно исти резултати на когнитивните тестови - во овој случај имало значителна разлика од 16 поени помеѓу братот и сестрата.

Секако, близнаците имале и многу сличности, но биле забележителни и разликите, што укажува на тоа дека треба да се преиспита колку нашата интелигенција зависи од нашите гени и колку таа е поврзана со околината во која сме воспитани.

- Сличностите беа очигледни во нивната личност, самодовербата, менталното здравје, задоволството од работното место и медицинската историја. За разлика од претходните истражувања, оцените за општата интелигенција и невербалното расудување на близнаците покажаа изразени разлики - пишуваат истражувачите во нивниот труд.

Близнаците се родени во Јужна Кореја во 1974 година, а биле разделени на двегодишна возраст откако еден од нив се изгубил на пазар. Откако девојчето било однесено во болница оддалечена 160 километри од семејниот дом, и покрај напорите на нејзиното биолошко семејство да го најде, на крај било посвоено од пар во САД.


И покрај многуте сличности - вклучително и во областите на менталното здравје и задоволството од работата - близнакот израснат во Јужна Кореја добил повисоки резултати во однос на перцептивното расудување и брзината на обработка.

Иако резултатите се јасни, сепак, причината за нив не е. Близначката од САД претрпела три потреси на мозокот како возрасна, забележуваат истражувачите, поради што се чувствува како „различна личност“. Сепак, невозможно е со сигурност да се каже дали тоа влијаело врз резултатите забележани во когнитивните тестови.

Она што, исто така, вреди да се земе предвид е дека семејните домови во кои биле израснати близнаците воопшто не биле слични. Имало повеќе конфликти и помалку слобода во домот во САД во споредба со оној во Јужна Кореја, велат истражувачите.

- Близнаците се израснати во многу различни средини, покрај различните земји и култури - пишуваат истражувачите.

Она што истражувањето го поткрепува во однос на природата наспроти подигнувањето е идејата дека одредени карактеристики на однесувањето можат да останат исти, дури и кога децата се воспитуваат во различни средини; така, на пример, и двајцата близнаци добиле високи оцени во однос на нивните нивоа на совесност и самодоверба.

Општо земено, САД се повеќе индивидуалистички и помалку колективистички во однос на националната култура во споредба со Јужна Кореја.
Истражувачите сметаат дека овие културни разлики веројатно имале влијание врз некои од пријавените резултати на личноста.

Иако е важно да не се извлекуваат премногу цврсти заклучоци од еден пар близнаци, наодите прават фасцинантни докази - а ширењето на лесно достапни ДНК-тестови значи дека е голема веројатноста и други изгубени близнаци да бидат откриени во годините што доаѓаат.

- Треба да идентификуваме повеќе такви случаи доколку постојат. И сè уште не ги разбираме сите механизми вклучени од гените на молекуларно ниво до однесувањата што ги набљудуваме секој ден - вели еволуцискиот психолог Ненси Сегал од Државниот универзитет во Калифорнија, првиот автор на истражувањето.

Извор: Science Alert
Фото: Freepik