Економскиот факултет од Прилеп беше домаќин на 11. Меѓународната конференција на тема: “Digital Transformation of the Economy and Society: Shaping the Future” („Дигитална трансформација на економијата и општеството: обликување на иднината“). Деканот на Економскиот факултет во Прилеп, проф. д-р Драгица Оџаклиеска, во оцените за актуелноста на темата посочува дека 60 насто од домашниот-бруто производ ќе бидат резултат на глобалните активности до 2022 година и нагласува дека сите овие процеси и имликацијата од дигиталната трансформација врз развојот претставуваат клучен предизвик за истражувачите во светот.

Финансискиот експерт Глигор Бишев оценува дека и кај нас дигитализацијата е присутна во речиси сите индустрии, особено во сферата на финансиите. Тој вели дека денес сме сведоци дека најнапредните, динамичните земји сѐ повеќе се дигитализираат и токму тие создаваат најмногу работни места. Ако претходно се сметаше дека нема да овозможи нови вработувања, се покажа спротивното: од една страна, се роботизираат и се автоматизираат одредени мануални процеси, а од друга страна, оние што се високоиновативни и стручни, тие сѐ повеќе бараат човечка димензија, високостручен кадар. Од тој аспект, искуството покажува дека во последните години со порастот на дигитализацијата се создаваат нови, креативни и повеќе платени работни места.

Од презентираните трудови на Меѓународната конференција непобитни се сознанијата дека во суштината на дигиталната економија се наоѓаат економските активности кои се резултат на милијарди онлајн-конекции кои секојдневно се случуваат меѓу луѓето, бизнисите, податоците и процесите. Главниот столб на дигиталната економија претставува хиперконективноста, или со други зборови, растечката поврзаност меѓу луѓето, организациите и машините, а која поврзаност е резултат на интернетот, мобилната технологија и интернетот на нештата. Дигиталните и мобилните технологии забележуваат неверојатен раст во последните неколку години. Тие продуцираат темелни промени во функционалниот код на економијата и општеството и предизвикуваат радикална трансформација на традиционалните развојни парадигми. Иновациите на производи (стоки и услуги), променливата структура на трошоците и намалувањето на бариерите за влез драстично ги менуваат индустриската структура и бизнис-моделите.

Според податоците на Светскиот економски форум, во текот на следната деценија, 70% од новокреираната вредност во економијата ќе бидат засновани на дигитални платформи. Процените упатуваат на сознанијата дека 60% од глобалниот БДП ќе бидат дигитализирани до 2022 година, односно ќе постои многу мала разлика меѓу дигиталната економија и економијата, како и меѓу дигиталното општество и општеството. Ова продуцира голем потенцијал за Четвртата индустриска револуција да ги зајакне општествата и да извлече голем број луѓе надвор од канџите на сиромаштијата. Сепак, успехот во голема мера зависи од можноста за создавање ефективни партнерства и соработка меѓу сите засегнати страни. Со други зборови, „затворањето на дигиталниот јаз значи многу повеќе од едноставно поврзување“. Зголемувањето на инвестициите за обезбедување пристап до интернет и пронаоѓањето решенија за креирање добар дигитален идентитет има есенцијално значење за соодветно адресирање на овој јаз и заштита на правата на индивидуите во општеството. Уште повеќе, за креирање безбедна и сигурна дигитална средина, потребно е да се воспостават глобални норми и практики кои ќе овозможат ублажување на сајбе-ризиците. Конечно, круцијално значење во затворање на дигиталниот јаз и обезбедување на широко распространети придобивки има развивањето нови механизми за партиципативно управување, кои ќе бидат комплементарни на традиционалната политика и регулатива.

Економскиот факултет - Прилеп упати благодарност до учесниците на Конференцијата и покажаниот интерес со над 150 трудови, и секако, во рамките на успешната соработка со опкружувањето ја нагласи конекцијата што ја остварува со партнерите-спонзори (Kromberg& Schubert, печатница Гинис, Comfy Angel, Витаминка, Sparkasse Bank,Матадор, Кули конфекција, Прилепска пиварница и хотел Салида) за несебичната поддршка и придонесот во успешната реализација на овој меѓународен настан. Инаку, Меѓународната конференција „Дигитална трансформација на економијата и општеството: обликување на иднината“, која се одржа на 19 и 20 октомври 2019 г., е прва од серијалот настани со кои почна одбележувањето на 60-годишнината од основањето на Економскиот факултет - Прилеп.