Неколку луѓе во Австрија завршија во болница откако користеле фалсификувани верзии на лекот за дијабетес „оземпик“ од данскиот „Ново Нордиск“, соопшти денеска австрискиот регулатор за здравствена безбедност.
Пациентите доживеале хипогликемија и напади, кои се сериозни последици што укажуваат на тоа дека производот содржел инсулин наместо активната состојка на „оземпик“ - семаглутид, соопшти регулаторот BASG.
Австриските истражители вчера предупредија дека фалсификуваниот лек можеби сè уште циркулира меѓу граѓаните.
Европската агенција за лекови (ЕМА) минатата недела предупреди дека има инјекции со лажно име оземпик.
Данскиот производител на лекови, „Ново Нордиск“, предупреди на зголемување на понудата на фалсификуван „оземпик“ на интернет и лекот за слабеење „вегови“. Двата лека се базираат на семаглутид.
Извор: МИА