Повеќе од 80 отсто од австралиските тинејџери продолжиле да користат социјални мрежи и по три месеци откако стапи во сила историската забрана за користење на тие платформи за помлади од 16 години бидејќи технолошките компании не воведоа ефикасни проверки на возраста, утврди австралискиот регулатор за интернет-безбедност.
Во истражувањето, регулаторот „Е-сејфти“ наведува и дека мнозинството деца на возраст од 10 до 15 години во март ги користеле социјалните мрежи исто толку често како и пред стапувањето на забраната во сила на 10 декември минатата година, додека истовремено е намалена свеста на родителите за нивните интернет-навики.
Иако уделот на децата што поседуваат кориснички профили паднал од 52 на 42 отсто, мнозинството од нив продолжиле да ги користат социјалните мрежи. Извештајот истакнува дека е забележан „статистички значаен пад“ на бројот на профили на „Јутјуб“, „Снапчет“ и „Тик-ток“.
- Мнозинството од помладите од 16 години кои имале профили пред стапувањето на забраната во сила успеале да ги задржат или да отворат нови и по три месеци, а главна причина за тоа беше неуспехот на платформите да воведат ефикасни мерки за проверка на возраста - соопшти „Е-сејфти“.
Австралија е првата држава во светот што воведе таква забрана поради загриженост за влијанието на социјалните мрежи врз менталното и физичкото здравје на децата и младите. Спроведувањето на законот будно го следат многу земји кои размислуваат за воведување слични ограничувања.
Пред забраната, речиси 86 отсто од анкетираните деца користеле барем една платформа со возрасно ограничување. Три месеци подоцна, тој удел и понатаму изнесувал повеќе од 81 отсто. Околу 58 отсто од тинејџерите изјавиле дека ги користат социјалните мрежи секојдневно или почесто, што е за нијанса помалку од периодот пред забраната, кога ги имало околу 60 отсто.
Исто така, истражувањето не покажало речиси никакви промени во спортувањето и физичката активност, уметноста и музиката, дружењето со пријателите и семејството или учеството на настани во заедницата.
Околу половина од децата што ги задржале своите профили изјавиле дека платформите воопшто не ја проверувале нивната возраст, што било најчеста причина поради која продолжиле да ги користат нивните услуги. Останатите рекле дека на нивните профили веќе биле наведени како лица стари 16 или повеќе години или дека системите за проверка на возраста погрешно процениле дека се постари.
Резултатите главно ги потврдија привремените податоци кои „Е-сејфти“ ги објави кон крајот на март. Потоа, регулаторот покрена истрага поради можна неусогласеност на пет платформи со законот: „Фејсбук“ и „Инстаграм“ на „Мета“, „Снапчет“, „Тик-ток“ и „Јутјуб“ на „Гугл“. Австралиската влада во јуни најави дека ќе ги удвои максималните казни за технолошките компании кои нема да ја почитуваат забраната и дополнително ќе ги зајакне овластувањата на регулаторот „Е-сејфти“ за прибирање информации.
- Иако „Е-сејфти“ од март утврди одредени подобрувања во постапувањето на индустријата, и понатаму постои загриженост поради усогласеноста на петте платформи кои тогаш беа именувани - соопшти регулаторот.
Извештајот, кој го изработи меѓународна советодавна група од универзитетски истражувачи, ги споредува податоците прибрани од повеќе од 4.000 деца и нивните семејства пред почетокот на забраната и три месеци по нејзиното стапување во сила.
Извор:
n1info.hr
Фото: Screenshot/BBC