Светот секоја година се соочува со топлотни бранови, а најпогодени се постарите, децата, жените и лицата со посебни потреби. Глобална мрежа на службеници го решава овој проблем во нивните градови.

Температурите на северната хемисфера соборуваат рекорди секоја година, а во многу земји се забележуваат екстремни, смртоносни горештини. Ако температурата драстично се зголеми, потенцијално сценарио засновано на моменталната состојба е дека околу 3,3 милијарди луѓе ќе се соочат со екстремни температури до крајот на векот, според студијата објавена во списанието „Одржливост во природата“ во мај 2023 година.

Во студијата, предводена од научници од британскиот Универзитет „Ексетер“ и кинескиот Универзитет „Нанџинг“, се вели дека 60 милиони луѓе веќе се изложени на опасни нивоа на топлина, кои се карактеризираат со просечна температура од 29 Целзиусови степени или повеќе.

Зошто топлината е толку опасна за луѓето и како можат земјите да го подготват своето население да се справи со сè почестите топлотни бранови?

Како високите температури му штетат на здравјето на луѓето?

Според Светската здравствена организација (СЗО), екстремната топлина може да резултира со голем број болести и смртни случаи, на пример, топлотен удар и хипертермија. Тие, исто така, ги влошуваат хроничните состојби и имаат индиректен ефект врз преносот на болести, квалитетот на воздухот и критичната инфраструктура.

Особено чувствителни на високи температури се постарите лица, доенчињата и децата, трудниците, лицата со попреченост, физичките работници и оние што работат надвор, спортистите и сиромашните.

Како можат да се заштитат луѓето?

Претходните студии покажале дека градовите се особено ранливи на опасни покачувања на температурата поради „ефектот на топлинска купола“. Зградите, патиштата и инфраструктурата ја апсорбираат сончевата топлина повеќе од природните средини како шумите и водата, зголемувајќи ги урбаните температури за дури 15 степени во некои случаи, во споредба со руралните области.

Градовите низ светот воведуваат нова улога на „службеник за топлина“ за да се справат со неизбежниот пораст на температурите. Една од нив е Кристина Хуидобро, која ја презела функцијата главен директор за овие прашања во главниот град на Чиле, Сантијаго, во март 2022 година.

Хуидобро вели дека главно следат стратегија од три страни: подготвеност, свесност и адаптација.

Адаптацијата може да вклучува категоризација на топлотните бранови на ист начин како и другите природни катастрофи, или поставување праг за предупредување за да се активира специфичен одговор на градот.

Третиот чекор е приспособување на градот на новата реалност на високите температури, главно преку создавање повеќе зелени површини. Но, садењето дрвја не е толку лесно како што мислат луѓето.

- Ние садиме дрвја на навистина густи улици, како поголемите градски авении, каде што има многу цемент. Треба да ископате дупка и да направите некои градежни работи. Целата идеја е да се обидеме да ја направиме сенката што ќе ја имаме во следните 20 или 30 години - вели таа.

Американските градови се борат со екстремни горештини

Соединетите Држави, каде што претходните студии покажале дека 12.000 луѓе годишно умираат предвреме од жештините, досега назначиле тројца главни офицери за борба против екстремните горештини во градските власти, имено во Феникс, Мајами и Лос Анџелес.

Лос Анџелес, рангиран како град кој се соочува со најголем ризик од природни катастрофи, вклучително и топлотен удар, неодамна започна кампања за изградба на повеќе „отпорни центри“ со сенка и ладење, напојувани од обновливи извори на енергија во заедниците со висок ризик. Овој град веќе има мрежа на центри за ладење претежно во библиотеки, каде што луѓето можат да се кријат од жештините.

Тие, исто така, работат на систем за рано предупредување кога се во прашање топлотните бранови.

Феникс работи на голем број адаптации, вклучително и изградба на тротоари за ладење со специјална смеса која го рефлектира сонцето.

Мајами планира големи кампањи за садење дрвја, а исто така потроши милиони долари на клима-уреди за жителите на јавните станови, истовремено обезбедувајќи финансиска помош за покривање на сметките за енергија за домаќинствата со ниски приходи.

Хуидобро од Сантијаго вели дека климатизацијата е генерално последното средство кога станува збор за приспособување на климата. Градските власти на Сантијаго сакаат да засадат 33 „мали шуми“ кои ќе се користат како климатски засолништа, особено во близина на училишта и здравствени установи. Тие се алтернатива на климатизираните центри за ладење кои се развиваат во САД и во Европа.

Извор: index.hr

Фото: Freepik