Хакирањето на фејсбук-профилот, односно преземањето на профилот од страна на сајбер-криминалец може да му се случи секому. Вештачката интелигенција дополнително им олеснува на хакерите лажно да се претставуваат клонирајќи го гласот со помош на ВИ и други техники.

Кога хакерите ќе дојдат до вашите податоци за најава и лични информации, можат да го преземат вашиот профил и да ви го оневозможат пристапот. Потоа можат да спроведуваат различни измами. Да ве доведуваат во заблуда вас или вашите пријатели, да ве уценуваат, да вршат финансиски измами или да ги искористат лозинките што ги користите на други услуги за да пристапат до вашите други профили и да украдат пари. Еве што треба да направите ако се сомневате дека вашиот фејсбук-профил е хакиран.

Дали вашиот фејсбук-профил е хакиран?

Постојат неколку знаци што покажуваат дека вашиот фејсбук-профил е компромитиран. Повеќето од нив лесно се забележуваат и се појавуваат многу брзо.

Најочигледниот знак е кога ќе се обидете да се најавите, а ќе сфатите дека воопшто не можете да пристапите до вашиот профил. Други показатели се промени на личните податоци на профилот, како нова профилна фотографија, датум на раѓање или место на живеење. Многу корисници дознаваат за хакирањето од пријатели или членови на семејството кои ќе ги известат дека од нив добивале необични пораки, често со барање за пари.

Ако во рамките на опцијата за безбедносна проверка сте ги вклучиле известувањата за најавување, „Фејсбук“ може да ве предупреди дека на вашиот профил му е пристапено од непознат уред и да побара да потврдите дека најавата е легитимна.

Што да направите ако вашиот „Фејсбук“ е хакиран?

Пред сè, нема причина за паника. Во повеќето случаи можно е релативно едноставно да се врати контролата над профилот. Решавањето на евентуалните последици што настанале по хакирањето може да биде нешто посложено.

Ако вашите податоци за најава се променети и повеќе не можете да пристапите до профилот, „Фејсбук“ нуди посебна страница на која можете да го пријавите проблемот и да добиете помош. Ваквите случаи најчесто се решаваат прилично брзо.

Ако сè уште можете да пристапите до вашиот профил, постојат неколку чекори кои можете самите да ги преземете за да ја вратите контролата, да ги исфрлите неовластените корисници и дополнително да го заштитите профилот. Потоа би требало да ги засилите безбедносните поставки и да ги предупредите пријателите и семејството за можни обиди за измама.

Чекор 1: Проверете дали сè уште имате пристап до вашиот профил

Првиот чекор е да утврдите дали сè уште можете да се најавите на вашиот фејсбук-профил. Ако не можете, треба да ја посетите наменската фејсбук-страница за враќање на профили, каде што ќе одговарате на неколку прашања и ќе бидете водени низ постапката за враќање на пристапот.

Ако можете да се најавите, отворете: Settings & Privacy → Settings → Password and Security → Where you’re logged in (Поставки и приватност → Поставки → Лозинка и безбедност → Каде сте најавени). На таа страница можете да ги видите сите уреди од кои вашиот профил е моментално најавен.

Ако забележите уред што не го препознавате или не сте го одобриле, кликнете на трите точки покрај него и изберете ја опцијата Log Out (Одјави се) за да го одјавите. Со тоа хакерот ќе го изгуби пристапот до вашиот профил.

Веднаш потоа променете ја лозинката така што ќе одите на: Settings → Password and Security → Passwords → Change Password (Поставки → Лозинка и безбедност → Лозинки → Промени лозинка).

Чекор 2: Проверете ги и променете ги лозинките на другите услуги

Наспроти многубројните предупредувања, многу луѓе користат иста или многу слична лозинка на повеќе различни веб-страници. Затоа, откако ќе ја промените лозинката за „Фејсбук“, размислете дали истата лозинка сте ја користеле и за:
електронско банкарство,
други социјални мрежи,
интернет-продавници или други услуги.

Кога хакерите ќе дојдат до една лозинка, често ја испробуваат и на други популарни услуги во надеж дека ќе добијат пристап и до тие профили.

Иако менувањето на сите лозинки може да одземе време, долгорочно може да ве заштити од многу посериозни проблеми. Новите лозинки би требало да бидат што е можно посилни и да содржат комбинација од:

-големи и мали букви,
-бројки,
-специјални знаци.

Исто така, препорачливо е да ги чувате во доверлив менаџер на лозинки.

Чекор 3: Засилете ги поставките за приватност и безбедност

Ако вашиот фејсбук-профил еднаш бил хакиран, би требало да направите сè за тоа да не се повтори.

Се препорачува да:

-ја ограничите видливоста на вашите објави само на пријатели или пријатели на пријатели;
-внимателно да прифаќате барања за пријателство и да не додавате лица што не ги познавате;
-не отвораат линкови освен ако не сте целосно сигурни дека се безбедни;
-размислите за користење ВПН (VPN - виртуелна приватна мрежа), кој го шифрира интернет-сообраќајот и им оневозможува на хакерите да ги пресретнат вашите податоци за најава и други лични информации.

Сите овие мерки се едноставни за примена, но можат да спречат сериозни проблеми во иднина.

Чекор 4: Известете ги вашите контакти

Добро е да им јавите на пријателите и семејството дека вашиот профил бил хакиран. Лицето што го презело вашиот профил можеби ќе се обиде да се претстави како вас и да ги контактира вашите пријатели за да продолжи со измамите.

Може од нив да побара:

-лични податоци,
-лозинки,
-да отворат лажни интернет-страници или линкови,
-да уплатат пари со образложение дека итно ви треба помош.

Ако однапред ги предупредите вашите контакти, ќе ја намалите можноста и тие да станат жртви на измама. Советувајте ги да не отвораат сомнителни линкови кои изгледаат како да сте ги испратиле вие и дополнително да ги заштитат своите профили.

Како можете да го вратите фејсбук-профилот?

Ако стравувате дека по хакирањето ќе мора да го избришете постојниот профил и да отворите нов, добра вест е дека тоа не е потребно.

Кога успешно ќе го вратите профилот, повторно ќе имате пристап до сите ваши објави, фотографии и контакти. Исклучок се ситуациите кога профилот бил неактивен многу долго време или кога „Фејсбук“ не може да потврди дека вие сте неговиот вистински сопственик. Во тие случаи компанијата може трајно да го затвори профилот.

Меѓутоа, во повеќето случаи пристапот успешно се враќа преку поставките на профилот или, ако тоа не е можно, преку Центарот за помош на „Фејсбук“.