Заклучно со денешниот ден човештвото ги има потрошено сите природни ресурси што годишно може да ги обезбеди планетата Земја, така што влегува во „еколошки долг“ два дена порано отколку лани.

Денот кога се пречекоруваат Земјините ресурси од 1970 година наваму настапува сѐ порано, освен во 2020 кога тоа беше на 22 август, за што причина беше намалената потрошувачка на ресурсите поради пандемијата.

Глобалната мрежа за истражување „Глобал футпринт нетворк“ што секоја година го пресметува тој датум соопшти дека на глобалната популација за обнова на сѐ што троши ѝ е потребен биокапацитет од 1,75 од Земјата.

Три милијарди луѓе живеат во земји што произведуваат помалку храна отколку што консумираат и заработуваат помалку од светскиот просек, се наведува во извештајот.

Исто така, 72 отсто од светското население живеат во земји со дефицит на биокапацитет и помали приходи од светскиот просек.

Во соопштението се посочува дека 60 отсто од еколошкиот отпечаток на планетата се состојат од емисии на јаглерод диоксид и дека тие мора да се сведат на нула до 2050 година за да се избегнат брзите климатски промени.

Фактот дека пречекорувањето на ресурсите трае веќе 50 години значи дека вкупните годишни дефицити создадоа долг за животната средина еквивалентен на 19 години планетарна регенерација.

„Резултатот е широко распространета деградација на екосистемот и атмосфера исполнета со гасови со ефект на стаклена градина“, се наведува во соопштението.