Граѓанските организации денеска организираат протестен марш против аерозагадувањето, кој ќе почне во 17 часот пред Министерството за животна средина и просторно планирање, а ќе заврши пред Владата во 18 часот.

 - Ние, обединети граѓански активисти од Скопје, Битола, Тетово, Гостивар, Струмица, Ново Село, Струга, Охрид и други градови и населени места, кои застанавме зад организацијата на Марш за чист воздух – #ЗеленаРеволуција, бараме исполнување на барањата кои се плод на долгогодишна граѓанска активност и иницијативи за подобрување и решавање на многубројните проблеми со загадување и уништување на просторот во кој живееме во нашата земја - велат од граѓанските организации.

Барањата се остварливи, конкретни со рокови и одбрани по темелна анализа, затоа очекуваме посветеност и сериозно внимание за секое од нив, сметаат тие.

- Не прифаќаме одговори дека се работи, дека е долготраен процес, најмалку дека треба да имаме разбирање зашто процесот е комплексен, тоа го знаеме – затоа и го разделивме на конкретни активности и барања во секоја област. Несфатливо е одолжувањето на конкретни активности како носење закони кои стојат готови и чекаат одлука, некои и по пет години, како Законот за почва на пример - се потенцира во соопштението од О2 Иницијатива.

За граѓанските организации е несфатливо кочењето на одредени активности заради нефункционалност на една или две алки во системот, несфатливо е неспроведување на актуелни закони од една или друга институција или причина.

- Несфатлива е инертноста кога се во прашање 3.500 животи на ваши сограѓани секоја година и пораст на тешки канцерогени заболувања. Затоа бараме исполнување на сите точки за активниот граѓански сектор да не биде принуден револтот да го подигне на друго ниво и да премине во граѓанска непослушност и повик за бојкот на претстојните избори, затоа што е премината секоја граница на толеранција по долгогодишни институционални борби - велат активистите.