Со брзина од речиси 53.000 километри на час два вештачки сателита за малку се разминале над американската сојузна држава Пенсилванија.

Се работи за инфрацрвениот астрономски сателит Ирса, лансиран во 1983 година, и експерименталниот сателит ГГСЕ-4, лансиран во 1967 година. Објектите минале еден покрај друг без инцидент. Тоа се случило во 1:39 часот по средноевропско време, околу 900 километри над градот Питсбург, соопшти гласноговорникот на американските вселенски сили.

Двата објекта се надвор од употреба, но се стравува дека при еден таков судир нивните делови би создале т.н. вселенски отпад што може да оштети други објекти околу Земјата.

Последниот судир на сателити се случил во 2009 година.

САД имаат најмногу активни сателити во орбитата – 1.007, од кои повеќето се комерцијални.