По неколку дена откако претседателот на Австрија, Александер ван дер Белен, ја најави кандидатурата за втор мандат, една третина од граѓаните не сакаат да излезат на гласање, а една третина оценуваат дека функцијата шеф на државата е непотребна, покажуваат резултати од најновата анкета.

Според истражување за телевизијата АТВ, 37 отсто од Австријците се за укинување на функцијата претседател, додека за зачувување на функцијата се изјасниле 48 проценти од испитаниците. Најголем број од оние што се за укинување на функцијата претседател се поддржувачи на Слободарската партија на Австрија (ФПО).

Според анкетата на неделникот „Профил“, 46 отсто од испитаниците изјавиле дека би гласале за Белен, а 23 отсто би гласале за друг кандидат.

Анкетите покажуваат дека 31 отсто од Австријците изјавиле дека не сакаат да излезат на претседателските избори.