Премиерот Зоран Заев денеска најави дека решението за лекови без квоти треба да стартува во периодот од први септември до први октомври, до кога надлежните работат на изнаоѓање механизми на контрола за да нема злоупотреби.

-Наша аспирација е меѓу први септември и први октомври да ги пуштиме лековите комплетно без квоти. Тоа е сериозен исчекор, државата влегува во сериозен ризик, но граѓаните ќе имаат лекови. Ако успееме да ги ставиме контролните механизми, ние ќе стартуваме со еден ваков процес, така што суштината е буквално пораката – немојте да крадете од граѓаните и државата, затоа што без разлика кој во каков сегмент работи тоа е казниво по Кривичниот закон и се одговара со казна затвор - изјави Заев одговарајќи на новинарско прашање по пуштањето во употреба на Ургентниот центар во Куманово.

Тој рече дека има сериозни индиции за злоупотреба во делот на позитивна листа на лекови и издавањето на рецепти.

-Прво, не сум обвинил никого. Реков јавно дека постојат сериозни индиции за злоупотреба во делот на позитивната листа на лекови и издавањето на рецептите. И ние очигледно гледаме дека, генерално, во буџетот сè повеќе се зголемуваат парите во делот на издавање лекови на позитивнта листа, а бројката или наталитетот во државата остануваат исти. Еве дури во еден дел се намалува поради миграцијата - рече Заев.

Тоа, според премиерот, дава сериозни индиции дека некаде се случуваат незаконски дејствија.