„Тајната вечера“ од Леонардо да Винчи (црква Санта Марија деле Грацие, Милано)

Сабрина Сфорца Галиција, истражувач од Ватикан, тврди дека го разбила математичкиот и астролошкиот код што се наоѓа на прозорецот над главата на Исус, а на кој има детали од глобални поплави што ќе почнат на 21 март 4006 година и ќе завршат на 1 ноември истата година. Поплавите ќе го уништат светот, но и ќе го најават новиот похуман свет (?!)




„Гола Маја“ од Франциско де Гоја (музеј Прадо, Мадрид) 

Оваа слика инквизицијата ја опишала како „непристојна и штетна за јавното добро“, а и ден-денеска важи за слика со најсексуална содржина на сите времиња. Фактот што главата и телото не се совршено споени го навестува внимателно осмислениот идентитет на раскошната убавица на креветот. А која, всушност, била таа? Се шпекулира дека станува збор за Пепита Тудо, љубовница на Мануел де Годој, контроверзниот шпански премиер во текот на Шпанската војна за независност, кој можеби бил и нарачател на сликата. Се споменува и Марија дел Пилар – убава страсна војвотка од Алба, со која Гоја веројатно имал афера. Неодамнешни истражувања ја побиваат оваа теза, иако војвотката красела многу од платната на Гоја.




„Пролет“ од Сандро Ботичели (галерија Уфизи, Фиренца)

Одредени истражувања го побиваат општото мнение дека станува збор за слика на која е насликана прослава на женската убавина и солидарност. Ремек-делото на Ботичели не е само сон на ботаничар со 500 растителни видови, туку се толкува како заговор против семејството Медичи и обид да се обединат идеите на христијанството, исламот и јудаизмот.




„Час по музика“ од Јоханес Вермер (Ројал колекшн, Лондон)

Колку и да ни се чинат пристојни, сликите на Вермер се преполни со еротски симболи. На оваа слика млада жена допира клавиши на вирџинал (инструмент што се поврзува со невиност и чистота) и ги впива инструкциите на својот тутор. Ако внимателно го погледнете огледалото врз неа, ќе забележите дека таа гледа директно во него. Бокалот со вино зад неа е афродизијак, големиот инструмент на подот е фалусен симбол, а гледачот на оваа слика е ставен во улогата на воајер.




Систинска капела, Микеланџело (Рим)

Според една неодамнешна теорија, во девет дела од Приказната за настанокот се кријат низа кабалистички пораки. Давид и Голијат формираат буква која ја симболизира силата во кабалата, а сето тоа би требало да изгради мост помеѓу католицизмот и јудаизмот.