Нова сорта на јаболка под името космик крисп, за чие развивање на научниците им биле потребни две децении и наводно трае до една година во фрижидер, од денеска е во продажба во САД.

Оваа американска сорта на јаболко потекнува од државниот универзитет во Вашингтон уште во 1997 година. Истражувањето и доаѓањето до цврсто, свежо и сочно јаболко чинеше 10 милиони долари.

Моментално јаболкото е достапно само во САД, но се очекува да пристигне и во продавниците низ светот на почетокот на следната година.

Оваа сорта се добива со вкрстување на две постојни сорти јаболка за да се создаде уште послатко, посочно овошје кое, ако правилно се чува, може да остане свежо и до една година.

Во Вашингтон растат повеќе од 12 милиони дрвја од ова јаболко, а овоштарниците зафаќаат околу 12.000 хектари. Се очекува овоштарите да остварат вкупна продажба од 30 милиони американски долари.

Сортата првично беше позната како WA38, а името космик крисп е инспирирано од ситните бели дамки на темноцрвената кора, која потсетува на ноќно небо.