Посетителите на Стоунхенџ овој август ќе добијат ретка можност да поминат 20 минути сами во еден од најпознатите праисториски споменици во светот, благодарение на иницијативата на организацијата „Инглиш херитиџ“.

Посетителите што однапред ќе купат влезници автоматски ќе учествуваат во извлекувањето за можноста да поминат 20 минути сами во рамките на камениот круг, без вообичаената турканица од туристи.

Организацијата наведува дека ова е прва иницијатива од ваков вид откако пред 125 години е воведено наплаќањето влезници за Стоунхенџ. За време на вообичаените посети, камењата се оградени со заштитна лента, а посетителите можат да ги набљудуваат само од одредена патека.

Сепак, добитниците во извлекувањето ќе можат да се приближат многу поблиску до древните монолити и да поминат неколку минути во тишина во рамките на кругот.

За време на пробната посета, на новинарот на „Гардијан“ му беше овозможено да помине 20 минути сам во кругот.

Надзорникот Ник Морабито ја отстрани заштитната лента и со тоа овозможи влегување во просторот кој инаку е недостапен за посетителите.

И понатаму важат строги правила - забрането е допирање на камењата, потпирање врз нив или седење на нив.

Сепак, посетителите имаат можност да видат детали кои инаку тешко се забележуваат, како што се трагите од лишаи, длабоките пукнатини и природните шари на површината на камењата.

Меѓу забележливите детали се и старите гравури, вклучувајќи ги и графитите што му се припишуваат на архитектот Кристофер Рен, чие семејство некогаш имало куќа во близина.

Иако во близина се наоѓа фреквентниот пат А303, звукот од сообраќајот е, според посетителите, повеќе оддалечено зуење отколку бучава која ја нарушува атмосферата.

Шефицата за операции на „Инглиш херитиџ“ за Стоунхенџ, Џорџија Батерс, оцени дека местото има посебно значење дури и за луѓето што не го доживуваат духовно.

Самостојниот пристап до камењата инаку е можен преку посебни истражувачки тури кои чинат околу 1.700 евра, додека за време на солстициумот влегувањето во кругот е бесплатно.

Сепак, тогаш Стоунхенџ се посетува од голем број луѓе, со музика и тапани.

Добитниците од августовското извлекување ќе можат да ги земат и членовите на нивната група кои резервирале посета во исто време, но ќе имаат можност и да влезат сами.

Извор: The Guardian
Фото: Magnific