Mагазинот „Форбс“ проценува дека американската поп-ѕвезда Тејлор Свифт e најбогата музичарка во историјата, со богатство од 2 милијарди долари, што претставува пораст од 100 проценти во споредба со 2024 година.

Тејлор Свифт (36), пејачката на мегахитот „Shake it Off“, стекна статус на милијардерка во 2024 година благодарение на турнејата „Ерас тур“.

„Форбс“ напиша дека Свифт е една од комерцијално најуспешните авторки на песни на сите времиња.

Во 2020 година Свифт ја промени музичката индустрија кога повторно го сними поголемиот дел од својата дискографија. Како резултат на тоа, тантиемите одеа директно кај неа.

„Форбс“, исто така, спомена дека нејзината турнеја стана најпрофитабилна концертна турнеја во историјата со приходи од 2,2 милијарди долари. Со парите ги откупи своите оригинални снимки, наведе магазинот.

Повеќегодишен спор за правата на албумите

На почетокот на кариерата Свифт имаше договор со издавачката куќа „Биг машин“ и таму ги сними своите први шест албуми. Како што е вообичаено, правата ѝ припаѓаа на издавачката куќа, која во 2019 година ги продаде за повеќе од 300 милиони долари на инвестициската компанија на поранешниот музички менаџер Скутер Браун.

Свифт изјави дека тоа се случило без консултации или нејзино одобрение.

Следуваше повеќегодишен јавен спор, кој Свифт често го споменуваше и во своите песни. Во 2020 година Браун ги продаде правата понатаму, овој пат на инвестициската компанија „Шемрок капитал“ од Лос Анџелес, од која Свифт сега ги откупи.