Соосновачот на „Алибаба“, Џек Ма, и извршниот директор на „Тесла“, Илон Маск, имаат спротивни мислења за ризиците и потенцијалните придобивки од вештачката интелигенција.

Тие двајца не можат да се согласат дали вештачката интелигенција ќе има позитивна или негативна улога во иднина.


Но, Маск изјави дека технологијата се развива побрзо од нашата способност да ја разбереме. И двајцата сметаат дека една од најголемите закани за иднината на човештвото е „колапсот на популацијата“.

Според нив, најголемата закана за животот на Земјата не е астероид, ниту вештачката интелигенција, туку падот на глобалната популација што се очекува во текот на овој век. Маск тоа го нарече колапс на популацијата, а со него се согласи и Ма, нагласувајќи дека и покрај 1,4 милијарда луѓе, според моменталните прогнози, Кина во текот на наредните 20 години ќе има голем недостиг на луѓе. Еден од големите проблеми за Кина е тоа што поради долгогодишната политика луѓето да имаат само едно дете, моментално нема доволно (млади) луѓе кои би се грижеле и би ја издржувале постарата популација, поради што експертите предупредуваат за опасните општествени и економски последици од оваа ситуација.

Но, двајцата технолошки лидери имаат сосема различен поглед кога станува збор за вештачката интелигенција - Маск е песимистичен и смета дека вештачката интелигенција е опасна закана, а Ма смета дека вештачката интелигенција во иднина ќе има голема улога. Прво, вели дека луѓето ги направиле компјутерите, а не обратно, и дека иако компјутерите денес се паметни, луѓето и понатаму се многу попаметни. Затоа за него вештачката интелигенција не претставува закана, туку технологија што ќе го преземе товарот што денес го носат луѓето.