Лондон воведува дневна такса од 27,90 евра за возилата што емитуваат висок степен на загадувачки материи, односно автомобилите што не го исполнуваат минимум евро 6 стандардот.

Таксата ќе ја плаќаат возачите кои со автомобили влегуваат во централниот дел од градот, а лондонските власти веруваат дека во борбата за почист воздух тоа е подобра мерка отколку забраната за дизел-возила.

Лондонскиот градоначалник Садик Кан им вети на своите сограѓани дека ќе ја намали емисијата на штетни гасови од сообраќајот во градот со околу 9 милиони жители.

Се проценува дека новите мерки на лондонските власти ќе погодат околу 2,5 милиона возила кои се движат во градот.

Германски градови размислуваат за забрана на дизел-возилата заради намалување на загадувањето, а британската престолнина појде по друг пат за да ја оствари целта.