Средното училиште „Здравко Цветковски“ во Скопје стана домаќин на шестиот „Пензиски парк“. Благодарение на еколошката акција на пензиските друштва во рамките на кампањата „Засади желба, за поубава иднина“, дворот на училиштето сега е побогат за 15 средно созреани листопадни садници кои ќе ги потсетуваат учениците на активниот удел што го имаат во градењето поубава иднина за себе, но и во создавањето поздрава околина за целата заедница.

- Примарна цел на еден родител е да го подучува и насочува своето дете кон одговорно живеење и континуирано вложување во својата иднина. Упатувам голема благодарност до пензиските друштва поради тоа што се однесуваат родителски кон сите нас. Оваа кампања „Засади желба, за поубава иднина“ беспрекорно ја отсликува и нивната грижа за младите генерации. Сите знаеме дека едукацијата на младите е многу важен фактор за нивна поубава иднина, токму затоа како училиште топло ја прифативме поканата да учествуваме во оваа кампања. Ние со години наназад се грижиме за средината во која нашите ученици се едуцираат и многу вложуваме во уредување и раззеленување на училишниот двор. Верувам дека учениците ќе ја прифатат пораката на оваа кампања, ќе се однесуваат одговорно кон својата иднина и ќе се грижат за животната средина – изјави Слободанка Киселовска, помошник-директорка во училиштето „Здравко Цветковски“ во своето денешно обраќање.

Сузана Бошковска-Златаревска од КБ Прво пензиско друштво а.д. Скопје, како претставник на пензиските друштва, во оваа пригода ја сподели целта на вложените напори за спроведување и проширување на општествено одговорната кампања.

- Најпрво, дозволете ми да им се заблагодарам на помошник-директорката на училиштето и на сите вас што сте овде денес и ќе ни помогнете заедно да го засадиме шестиот по ред „Пензиски парк“ како дел од едукативната кампања „Засади желба, за поубава иднина“. Ние, како пензиски друштва, веруваме дека иднината е резултат на чекорите што ги преземаме денес, дека со секоја денешна инвестиција сме чекор напред кон обезбедување поквалитетни денови во иднина. Исто како што пензиското осигурување ни обезбедува подобри услови во пензионерските денови, така секое ново засадено дрвце е една вредна инвестиција која ни дава поголема сигурност за здрава средина кон која целиме, а воедно ќе нуди сенка и засолништво за идните наши внуци и правнуци.

Здравата животна средина е една важна тема која претставува заеднички интерес на сите нас, нешто што сите нè засега и за што сите треба да се грижиме. Ни претставува особена гордост и задоволство што заедно ја реализираме оваа активност, а истовремено даваме придонес за едукација и подигнување на еколошката свест кај младите. Посакуваме оваа акција да прерасне во традиција и заедно ние, вие и следните генерации да ги уживаме бенефитите од неа – нагласи Бошковска-Златаревска.

Досега, преку кампањата за информирање и едуцирање на младите за придобивките од членувањето во задолжителниот и доброволниот пензиски фонд, организирана од страна на Сава пензиско друштво а.д. Скопје, КБ Прво пензиско друштво а.д. Скопје и Триглав пензиско друштво а.д. Скопје, „Пензиски паркови“ никнаа во средните училишта „Св. Кирил и Методиј“ во Охрид, „Кочо Рацин“ во Свети Николе, „Јане Сандански“ во Струмица, „8 Септември“ и ,,Д-р Панче Караѓозов“ во Скопје.

По двете успешно завршени акции овој месец, пензиските друштва најавуваат нови садења од септември.