Градоначалничката на Амстердам се обиде да добие политичка поддршка за нејзиниот план за чистење на прочуениот црвен кварт во градот откривајќи податоци дека една третина од странските туристи поретко би го посетувале градот доколку не би можеле да купат канабис во специјализираните кафулиња.

Фемке Халсема се обидува да го намали бројот на локации на кои се продава канабис и предлага да се забрани продажба на канабис на странски туристи. Во писмо до група советници таа објавила податоци од анкета за да добие поддршка за нејзината идеја, чија цел е да ја намали популарноста на користењето дроги помеѓу туристите.

Амстердам има огромен број туристи што го посетуваат центарот на градот, но поради преголемиот метеж, градот повеќе не ги рекламира атракциите како порано. Во Амстердам живеат 1,1 милион луѓе, а го посетуваат над 17 милиони посетители годишно.


Властите сакаат да ги одвикнат странските туристи од искористувањето на политиката за толеранција во однос на користењето канабис. Според анкетата претставена од Халсема, 34% од туристите поретко би го посетувале градот доколку на странците не им се дозволи да купуваат канабис.

11% од испитаниците изјавиле дека не би дошле никогаш повеќе. 40% изјавиле дека повеќе не би користеле „хашиш или трева“ при нивните посети доколку се воведе таква забрана. Секој петти изјавил дека би пуштил некого да му купи канабис, а 18% изјавиле дека би пронашле друг начин за да купат дрога.

Анкетата била спроведена на 100 туристи во населбата каде што се наоѓа црвениот кварт. Испитаниците биле на возраст од 18 до 35 години, а повеќето од нив (57%) изјавиле дека специјализираните кафулиња за продажба на канабис играле клучна улога во нивната одлука да го посетат Амстердам.

Градоначалничката на Амстердам се обидува и да постигне договор во однос на парадоксот со политиката за толеранција во Холандија. Имено, лиценцираните кафулиња може да продаваат канабис, додека производството на дрогата не е легално. Така, кафулињата често купуваат дрога од организирани криминални групи. Халсема бара да се спроведе истражување за да се намали популарноста на канабисот кај туристите и да се разгледаат законите поврзани со овие практики.

Во соопштение градот Амстердам објави дека од 1 април ќе бидат забранети групните тури во црвениот кварт и други делови од градот во кои има прозорци со сексуални работнички. Турите со водичи во другите делови од градот треба да бидат официјално дозволени за да се реализираат.

Освен тоа, бројот на луѓе во турите се ограничува на 15 и е забрането застанување на места каде што има голем метеж, како што се тесните мостови, пред домовите, но и на влезовите на рестораните и продавниците пред нивното отворање. Ќе има казна од 190 евра за водичите што ќе ги прекршат правилата.

Автори: Даниел Бофи и Џон Хенли
Извор: theguardian.com