Почнува со облак во форма на печурка за кој светот се надева дека никогаш повеќе нема да го види.

Сценаријата за мапирање и пресметките од последиците од нуклеарна зима не се ништо ново и датираат од времето на Студената војна.

Децении подоцна, знаеме многу повеќе за ефектите на честичките во атмосферата врз земјоделството. А последиците се мрачни, како и секогаш.

Користејќи ги најновите податоци за приносите на земјоделските култури и ресурсите за рибарство, група научници од целиот свет предложија сценарија што го приближуваат она што би можеле да го очекуваме од снабдувањето со храна како последица на нуклеарен конфликт.

Ако ги оставиме настрана непосредните жртви во нападите, кои би можеле да бидат стотици милиони, стапката на смртност само од изгладнувањето може да го уништи поголемиот дел од светското население.

Истражувачите го користеле Моделот на систем на заедницата на Националниот центар за атмосферско истражување за да предвидат како временските обрасци може да се променат со додавање саѓи и прашина создадени од нуклеарни експлозии.

Ова потоа било искористено за да се направат процените за тоа како приносите во земјоделските култури и морските резерви ќе реагираат на промените во температурата на површината, директната и дифузна светлина и врнежите.

Резултатите не беа убави. Земете релативно мало нуклеарно бомбардирање кое вклучува околу 100 детонации, како што би можеле да очекуваме доколку тензиите меѓу Индија и Пакистан зовријат.

Според пресметките на истражувачите, 5 милиони метрички тони честички би биле фрлени во атмосферата. За споредба, катастрофалните шумски пожари во Калифорнија во 2017 година и оние во Австралија на крајот на 2019 година испуштија по 1 милион метрички тони.

Последиците би значеле дека повеќето од нас ќе имаат пристап до 8 отсто помалку калории, а 255 милиони луѓе ќе гладуваат во текот на следните години. Иронично, приспособувањата во начинот на кој се храниме може да доведат до тоа некои заедници да имаат повеќе храна во нивните чинии, зголемувајќи го нивниот внес до 5 отсто.

Како што саѓите во воздухот се зголемуваат со поголем број нуклеарни бомби, ќе биде потешко да се најдат начини да се измерат ресурсите на храна.

Војната што би ги исцрпила американските и руските резерви од илјадници бомби ќе додаде 150 милиони метрички тони прашина во атмосферата на нашата планета, лишувајќи ги луѓето во светот од три четвртини од нивните калории.

Префрлањето на резервите на добиточна храна во резерви за итни случаи и јадењето на она што сега го фрламе нема да нè одведе далеку - тоа би било бавно гладување за 5 милијарди луѓе во светот додека се борат да добијат доволно храна за да преживеат во следните две години.

Снабдувањето со храна ќе зависи од тоа каде живее населението. Во сценарио каде што 250 нуклеарни експлозии исфрлаат 27 милиони метрички тони материјал во воздухот, на високите географски широчини на северната хемисфера ќе се забележи пад од повеќе од 50 отсто во собраните калории и околу 20 до 30 отсто пад на риболовните резерви.

За нациите поблиску до екваторот, просечното намалување на калориите би било помалку од 10 отсто.

Како што бевме сведоци во конфликтот меѓу Украина и Русија, трговијата со храна речиси сигурно ќе биде прекината. Нациите зависни од храна што се испраќа од друго место ќе треба брзо да се приспособат.

За некои заедници ова можеби не е толку лошо како што звучи.

Без меѓународна трговија што ќе ја надополни исхраната, австралиското население сè уште може да добие барем половина од своите калории од пролетната пченица. Симулациите спроведени од истражувачите открија дека оваа култура ќе доживее минимален пад на приносот, или можеби дури и мала добивка.

Снабдувањето со храна на Нов Зеланд може да се соочи со помало влијание од нациите кои се потпираат на култури како оризот.

Сепак, како што забележуваат истражувачите, социо-политичките превирања што неизбежно би следувале ќе ги претворат релативно директните предвидувања за економијата на храната во хаотичен неред.

- Но, ако ова сценарио навистина се случи, Австралија и Нов Зеланд веројатно ќе забележат прилив на бегалци од Азија и од други земји што ќе имаат недостиг на храна - забележуваат авторите.

Додека студијата ги унапредува минатите предвидувања со попрецизни податоци, сè уште има многу непознати работи кога станува збор за начините на кои човештвото ќе се бори во пресрет на нуклеарна војна.

Идните мерки би можеле да ги искористат предностите на подобрените модели кои вклучуваат повеќе култури или да предвидат како трговските и економските системи ќе ги прераспределат стоките.

Други фактори, како што се губењето на озонот и смртта на опрашувачите, исто така би влијаеле. Ако се земат тие работи предвид, нашата стапка на смртност може да расте уште повеќе.

Не дека би сакале да дознаеме колку би можеле да бидат точни ваквите предвидувања. Засега тоа е хипотетички исход што можеме само да се надеваме дека лидерите на нуклеарните нации го имаат на ум.

Извор: Science Alert
Насловна фотографија: Wikipedia