Високо на падините на планината Профитис Илијас, далеку од туристичките метежи, меѓу боровите се крие една од најмистериозните градби на грчкиот остров Родос. Станува збор за вилата Де Веки, напуштена резиденција која со децении ја поттикнува имагинацијата на посетителите и истражувачите.
Иако многумина ја нарекуваат „вилата на Мусолини“, Бенито Мусолини никогаш не живеел во неа. Неговата идеја била по завршувањето на политичката кариера да се повлече и да живее таму, во луксузно засолниште со поглед на Егејското Море. Но историјата имала поинакви планови.
Резиденцијата била изградена во 1936 година од Ќезаре де Веки, тогашен гувернер на Додеканезите и близок соработник на Мусолини. Вилата не била само луксузен проект, туку и симбол на пошироките амбиции на Италија во регионот.
По италијанската окупација на островот во 1912 година, Мусолини ги гледал овие острови како можност за проширување на влијанието и зајакнување на позицијата во Источниот Медитеран. Додеканезите требало да станат стратешки важна област, а Родос - клучна точка за воени операции.
Вилата била изградена на речиси 700 метри надморска височина и нудела спектакуларен поглед кон морето, турскиот брег и блискиот остров Сими. Била замислена како совршено прибежиште за елитата, но и како демонстрација на моќ.
Крај на плановите и драматичен пресврт
Амбициозните планови пропаднале со избувнувањето на Втората светска војна. Италија ѝ се приклучила на нацистичка Германија, а војната брзо ги променила односите во Европа.
Иако вилата била целосно подготвена да го прими италијанскиот диктатор, тој никогаш не стигнал на островот. Неговата судбина завршила трагично пред да стапне во своето планирано засолниште. Во 1945 година бил заробен од италијански партизани и погубен, а неговото тело било јавно изложено во Милано.
По војната, кога Додеканезите преминале под грчка власт, вилата била напуштена. Со текот на времето почнала да пропаѓа. Некогашните раскошни простории станале празни руини, ѕидовите биле прекриени со графити, а природата полека ја презела зградата.
Постојат мислења дека вилата намерно била оставена да пропадне, како симбол на пропадната идеологија и потсетник на периодот на италијанската власт на островите.
Грчките власти во последните години повеќепати се обиделе да ја продадат вилата, со идеја да привлечат инвеститори и да ја оживеат областа. Но, и покрај интересната историја и уникатната локација, таа сè уште го чека новиот сопственик.
Денес вилата Де Веки стои како тивок сведок на минатото. Привлекува љубопитни патници, љубители на историјата и фотографи кои во нејзините распаднати ѕидови бараат приказни од едно друго време.
Фото:
Instagram