На аеродромот во Диселдорф, Германија, поради дефект, дојде до проблеми околу испораката на куфери, па многу патници полетаа без својот багаж.
Како што пренесуваат германските медиуми, седум ленти за предавање багаж откажаа, така што илјадници куфери се собраа во салата за испорака бидејќи не можеа да се префрлат во авионите.
Од аеродромот соопштија дека се работи за технички проблем. По неколку часа само ограничен број куфери се поминати низ безбедносната контрола и ставени во авион.
Се проценува дека околу 2.500 куфери останале на аеродромот во Диселдорф.
Во меѓувреме, дефектот е отстранет и сите ленти работат нормално. Најавено е дека багажот во најбрз можен рок ќе им биде доставен на патниците.
Извор: МИА