Руските инвестиции во недвижности во Турција се зголемија за 199 проценти во првите девет месеци од годинава во споредба со истиот период од 2021, покажаа податоци од турскиот статистички институт.

Според податоците, руските граѓани купиле околу 9.311 домови во периодот од јануари до септември.

Продажбата на имот на странци во целата земја се зголеми за 32,5 отсто на годишно ниво за периодот и достигнаа 49.644 единици.

Во првите девет месеци најмногу имот е продаден во Истанбул, 19.594 недвижности.

Потоа следуваат Анталија со 14.656, Мерсин со 2.596 и Анкара со 2.295. Западен Измир и црноморските провинции Самсун и Трабзон влегуваат во десетте најжешки дестинации за посочениот период.

Од март има брз пораст на купените живеалишта од страна на руски и украински граѓани. Во првите девет месеци од минатата година Русите купија само 3.115 единици недвижен имот.