Хрватска има 1.244 острови, од кои само 66 се населени. Над 80 отсто од помалите острови се во сопственост на државата, а преостанатите се во приватна сопственост.
Еден таков е Мали Космаш, со површина од 5.000 квадратни метри. Тој е во сопственост на жител на околното место Винишче, кој сега го продава. Цената на овој мал остров во моментов изнесува 700.000 евра, но се очекува да стигне и до еден милион евра.
Овој остров е на продажба од 2016 година и сè уште се бара сопственик. Според Јасмина Билишков, сопственичка на агенција за недвижности, имало заинтересирани купувачи од Хрватска и од странство, но најчесто се откажуваат кога ќе дознаат дека не е дозволено градење на островот.
Фото: Pixabay
Островчето е обиколено со високи карпи, па затоа е тешко да се пријде, а властите велат дека таков остров е погоден само за агрикултура.
Билишков смета дека Хрватска би можела да заработи со продажба на ваквите острови и треба да го следи грчкиот пример и да дозволи изградба на нив. Но, за тоа е потребно да се менуваат закони и просторниот план.
Освен тоа, според хрватскиот закон, брегот на островите е поморско добро со кое управуваат властите и не може да биде во приватна сопственост.
Извор:
Indikator
Насловна фотографија: Pixabay