Вики Спит од Велика Британија, чиј партнер почина по вакцинација со „Астра зенека“, е првото лице што доби отштета поради смрт предизвикана од вакцинирање.

Спит доби максимална отштета во износ од 120.000 фунти, околу 140.000 евра. Но, за неа тоа не е доволно и надоместокот не е соодветен, јави Би-би-си.

Таа повикала брза помош на 13 мај минатата година, кога на нејзиниот партнер му се влошила здравствената состојба поради „мачни“ главоболки. Шест дена подоцна, тој починал во болница во Њукасл.

Во неговата посмртница е наведено дека пациентот „починал по компликации од вакцина“.

Спит, која има 38 години, тврди дека влегла во долгови откако ја снемало заработката на нејзиниот партнер. Според неа, таа требало да добие околу 180.000 фунти или близу 210.000 евра.

Како што таа посочува, нејзиниот партнер бил здрав, во добра физичка форма и би имал шанси да преживее, доколку лекувањето започнело порано.

Таа нагласи дека по неговата смрт, црниот дроб и бубрезите на партнерот се донирани и со тоа се спасени животите на три лица.