Британското цивилно воздухопловство денеска соопшти дека предвиделе 70 лета за итни случаи со кои треба да се вратат 16.500 туристи во земјата, откако најстарата светска туристичка компанија „Томас Кук“ прогласи банкрот.

Агенцијата најави банкрот во понеделникот по неуспешните преговори со доверителите, оставајќи незгрижени повеќе од 600.000 туристи кои имаат резервирано одмори или веќе се на годишен одмор во различни земји низ целиот свет.

Поради пропаѓањето на туристичкиот оператор формиран пред 178 години, стотици илјади патници се „заробени“ на дестинации низ светот, додека „филијалите“ во други земји бараат помош, а хотелиерите во многу дестинации се загрижени за можното намалување на бројот на туристите.