Некои професии се постресни од другите, а некои сектори имаат повеќе стресни работни места од другите. „Јуроњуз бизнис“ прави анализа за да види во кои европски земји вработените се под најголем стрес.

Глобалната несигурност и отпуштањата од работа може да го отежнат наоѓањето работа. Истовремено, зголемените трошоци за живот ги тераат луѓето да ги задржат нивните работни места и покрај тоа што се прилично стресни.

Британската компанија за отплата на лична повреда, „Claims.co.uk“ состави извештај во кој се истакнуваат најстресните работни места во Велика Британија, додека за работните места во Европа истражувањето го правела компанијата за обука „Лепаја“ во земји како Холандија, Белгија и Германија.

Од извлечените податоци за Велика Британија, извештајот вели дека полицајците се најподложни на стрес, а веднаш зад нив се социјалните работници и професионалците за социјална заштита. Речиси 1 од 50 луѓе изјавил дека неговата работа има негативно влијание врз неговото ментално здравје.

Во Европа, образованието и здравството се два сектори во кои вработените чувствуваат најголем стрес.

- Се чини дека долгите часови, големата одговорност и улогата во јавноста придонесуваат за негативното влијание врз менталното здравје на вработениот. Поттикнувањето на редовни паузи, нудењето ресурси за ментално здравје и промовирањето отворена комуникација може да им помогне на вработените поефикасно да управуваат со своето ментално здравје - изјави портпаролот на „Claims.co.uk“.

Недостиг на баланс помеѓу работата и животот

Во неколку случаи, голем дел од стресот на работа доаѓа од фактот дека границите помеѓу работата и личниот живот стануваат сè понејасни, делумно поради порастот на работата на далечина.

- Некои вработени ја немаат можноста целосно да се исклучат од работата. Ова особено важи за малите бизниси - изјави Тод Дејвисон од осигурителната компанија „Пјурбек персонал гаранти“.

Образованието и здравството се меѓу најстресните работни места во Европа

Истражувањето спроведено од „Лепаја“ покажа дека 56 отсто од вработените во Холандија изјавиле дека чувствуваат стрес, 67 отсто од вработените во Белгија, 70 отсто од вработените во Обединетото Кралство и 71 отсто од вработените во Германија.

Во Германија, образованието, секторот на производство на автомобили, здравството, јавните услуги и финансиите се покажале како најстресни сектори за работа. Во Холандија секторот здравство, образование и јавните услуги биле најстресните сектори, заедно со угостителските и информациските и комуникациските работни места.

Во Обединетото Кралство, освен полицајците и социјалните работници, и медицинските сестри се сметаат за работни позиции со најголем стрес, како и професорите во основно, средно и на факултет.

Некои од главните причини за високите нивоа на стрес, што понекогаш може да доведе до исцрпеност, беа големиот обем на работа, како и зголемувањето на неплатените задачи. Кон тоа придонесе и неплатената прекувремена работа, како и чувството на изолираност на работа.

Слично на тоа, вознемиреноста за безбедноста на работното место и стравот од отпуштање предизвикуваат многу стрес, како и прифаќањето работникот да работи задачи што нема да му се платат. Во некои случаи, и заплашувањето и малтретирањето од колегите, значително придонесуваат за нивото на стрес.

Знаците на исцрпеност вклучуваат проблеми во концентрацијата, намалено чувство на гордост во работата и губење на мотивацијата.

Други знаци се замор, фрустрација, необјаснети главоболки и промени во апетитот или навиките за спиење.

Извор: Euronews.com
Фото: Freepik