Бројот на дипломирани студенти во Македонија лани бил за 2,2 отсто повисок во споредба со 2018 година, објави Државниот завод за статистика. Од вкупниот број дипломирани студенти, 85,5 % се редовни, а 14,4 % се вонредни. Процентот на дипломирани студентки изнесува 57,7 %. Од вкупниот број студенти, 36,4 % дипломирале во рокот, додека 63,5 % дипломирале по рокот.

Лани дипломирале вкупно 7.874 студенти, од кои 4. 549 биле жени. Редовно дипломирале 6.739 студенти, а вонредно – 1.135. Од вкупниот број дипломирани, на државните универзитети завршиле 5.845 студенти, 2004 диломирале на приватните, а вкупно 25 (од кои 14 жени) на верските факултети.

На најголемиот универзитет во земјава „Св. Кирил и Методиј“ традиционално има најмногу дипломирани – вкупно 3.161 студент. Следува Државниот универзитет во Тетово со 1.178, универзитетот „Гоце Делчев“ во Штип со 724 дипломци и „Св. Климент Охридски“ во Битола со 676 студенти.

Најмногу дипломирале на Економскиот факултет при УКИМ – 498 студенти. Следуваат Филозофски факултет со 349 дипломци, Медицински со 317, Факултетот за електротехника и информациски технологии со 289 дипломирани.

На ДУТ предводат Факултетот за медицински науки со 229, односно Правиот факултет со 220 дипломци. На УГД најбројни се дипломираните студенти по медицински науки – 255, а на УКЛО – дипломираните на Факултетот за туризам и угостителство во Охрид – 145.