Литванија е најсреќното место во светот за децата и за оние под 30 години, според Светскиот извештај за среќа за 2024 година.

Ниската кирија, бесплатното образование и ноќниот живот придонесуваат оваа земја да ја добие титулата.

Светскиот извештај за среќа ги рангира земјите врз основа на истражување за мерење на среќата спроведено од „Галуп“, каде што испитаниците го оценуваат квалитетот на нивниот живот.

Литванија беше рангирана на 19. место на вкупната листа за среќа, но го обезбеди првото место на ранг-листата под 30 години.

Литванците помлади од 30 години се оценија себеси со 7,76 од 10 на скалата за среќа. За споредба, оние од иста возрасна група во САД се оценија себеси со 6,392 од 10, со што се најдоа на 62. место на глобално ниво.

Веб-страницата „Гардијан“ истражуваше зошто генерацијата З во Литванија и помладите милениумци се толку задоволни од нивниот квалитет на живот.

Една од причините зошто младите Литванци се посреќни е тоа што универзитетот е бесплатен за голем дел од населението.

23-годишниот Гантас Бендикас за „Гардијан“ изјави дека ќе дипломира без да има студентски долг. Во меѓувреме, во САД просечниот студентски долг е околу 39.000 долари.

Исто така, кириите се релативно ниски: според „Евростат“, Литванија е едно од најевтините места во Европа за изнајмување домови.

28-годишната Џолита Ваиткуте за „Гардијан“ вели дека ова се однесува и на изнајмување студио.

- Кога разговарам со пријателите што живеат во Париз, Токио, Лондон, сфаќам колку сум среќна што имам свој простор - вели таа.

Според „Гардијан“, едно студио во зградата на Ваикуте чини од 109 до 544 долари месечно. Ова им овозможува на оние во уметноста да напредуваат во Литванија.

За споредба, непрофитниот медиум „Призм“ објави дека недостапните станови, скапите студиски простори и нестабилните приходи ја прават работата во уметноста предизвик во САД.

На почетокот од оваа година Рикардо Серхио Шмиц, бразилски консултант во Вилнус, за „Бизнис инсајдер“ изјави дека младите имаат многу можности за кариера и дека парите ќе ги однесат подалеку во Литванија отколку на многу други места.

Тој, исто така, го забележа „стартап менталитетот“ на Вилнус, при што надвор од градот се појавија технолошки еднорози како „Винтед“ и „Норд секјурити“.

Освен тоа, Вилнус нуди доста добар ноќен живот.

- Би го оценил ноќниот живот како еден од најдобрите во Европа - вели 21-годишниот Данил Швагер.

Извор: Business Insider
Фото: Freepik