Светските океани се соочуваат со „тројна закана“ од екстремно затоплување, загуба на кислород и закиселување, при што екстремните услови стануваат многу поинтензивни во последните децении и создаваат огромен притисок врз морскиот живот на планетата, покажува новото истражување.

Околу една петтина од светските океани се ранливи на три закани кои погодуваат одеднаш, поттикнати од човечка активност како што се согорувањето на фосилните горива и уништувањето на шумите, покажа новото истражување.

Главниот автор на истражувањето предупреди дека светските океани веќе се турнати во екстремна состојба поради климатската криза.

- Влијанијата на оваа состојба веќе се видливи и може да се почувствуваат - вели Џоел Вонг, истражувач во ETH Цирих, кој го наведе добро познатиот пример на топлина што предизвика изумирање на морскиот свет во Тихиот Океан.

- Интензивните екстремни настани како овие веројатно ќе се случат повторно во иднина и ќе ги нарушат морските екосистеми и рибарството насекаде низ светот - додаде тој.

Истражувањето ја анализирало појавата на екстремна топлина, деоксигенација и закиселување и открило дека таквите екстремни настани можат да траат до 30 дена, а тропските региони и Северниот Пацифик се особено погодени од растечките закани.

Климатолозите се вознемирени од немилосрдното зголемување на топлината на океаните, која достигна неверојатно ниво во последните месеци.

- Ваква топлина буквално не се памети, беше неверојатно да се видат најновите податоци. Не можеме целосно да ги објасниме температурите што ги гледаме во Атлантикот, што, на пример, се дел од причината зошто сезоната на урагани е толку загрижувачка оваа година. Сето тоа е прилично страшно - вели Андреа Датон, геолог и климатолог од Универзитетот во Висконсин-Медисон, која не беше вклучена во новото истражување.

Но, покрај топлината, која ги принудува рибите и другите видови да се преселат во попогодна клима доколку можат, океаните плаќаат уште една голема цена со апсорпција на огромни количества топлина и јаглерод диоксид од емисиите на фосилни горива кои инаку дополнително би ја загреале атмосферата на Земјата. Дополнителниот јаглерод диоксид ја прави морската вода покисела.

- Тоа значи дека морскиот живот се преселува од местата каде што може да преживее. Луѓето треба да разберат дека океаните нѐ штитат од количината на топлина што ја чувствуваме на копното, но тоа не е без последици. Океаните не се само убава заднина за вашите селфи-фотографии, ние се потпираме на нив за нашите животи - додаде таа.

Извор: 6yka.com
Фото: Freepik