Новите наставни програми за седмо одделение, чија примена согласно планот за реформирање на основното образование ќе започне од учебната 2024-2025 година, се веќе изработени, соопштија од Министерството за образование и наука, додавајќи дека. Бирото за развој на образованието, како институција под чија надлежност е овој процес, навремено постапило и го испочитувало рокот за исполнување на обврската договорена меѓу МОН и БРО.

-Ова подразбира и навремено започнување на постапката за изработка на нови учебници. Наставните програми се доставени до Министерството за образование и наука, така што наскоро Педагошката служба ќе објави повици за автори и за избор на рецензенти. Се очекува процесот на избор на учебници за седмо одделение, графичко уредување и испорака, целосно да заврши пред следниот септември и учениците на првиот училишен ден, пред себе да ги имаат сите учебници. Изработката на учебници е комплексен процес чие времетраење зависи од низа фактори, меѓу кои, врз одреден дел, институциите немаат влијание. Сепак, со навременото доставување на наставните програми и отпочнувањето на постапката на одобрување учебници, се намалува веројатноста за доцнење на процесот, односно се обезбедува континуитет на планираните промени - стои во соопштението од МОН.